7. BİRGƏ RAZILAŞMA və VƏTƏNDAŞLIQ İNSTİTUTU
7. BİRGƏ RAZILAŞMA və VƏTƏNDAŞLIQ İNSTİTUTU
VƏTƏNDAŞLIQ
İNSTİTUTU barədə danışarkən ilk növbədə bir neçə mühüm sualı cavablandırmağımız
vacibdir. 1. VƏTƏNDAŞ kimə deyilir? 2. VƏTƏNDAŞ kimliyi nədir? 3. VƏTƏNDAŞLIğı
necə institulaşdırmalıyıq?
Əvvəlki
yazılardan birində qeyd etmişdim ki, VƏTƏNDAŞ DÖVLƏTlə çoxşaxəli münasibətlər
sistemi kontekstində hüquqi status, vəzifə (öhdəçilik) qazanmış və dövlətin
idarəçiliyində aktiv və ya passiv şəkildə öhdəçiliyi olan insanlar, fərdlər, cəmiyyətin
üzvləridir. Başqa cür desək, Mən, Sən və Onun, yəni bizim BİRGƏ RAZILAŞMA əsasında
qurduğumuz DÖVLƏTlə qarşılıqlı öhdəliklər üzərimizə götürdüyümüzə görə yeni bir
kimliyimiz yaranır ki, ona VƏTƏNDAŞ kimliyi deyirik.
VƏTƏNDAŞ
olmağın əsas prinsipləri bunlardır:
1. VƏTƏNDAŞ - BİRGƏ RAZILAŞMA başda olmaqla bütün qəbul
edilən Ana yasa və qanunlarla təsbit olunmuş insan (fərd) VƏTƏNDAŞ hüquq və
azadlıqlarını, haqlarını hər yerdə daima müdafiə edən cəmiyyət üzvüdür.
2. VƏTƏNDAŞ - DÖVLƏTin, HÖKUMƏTin, HAKİMİYYƏTin fəaliyyətinə
daim nəzarət etməyə borcludur.
3. VƏTƏNDAŞ - DÖVLƏT (hökumət, hakimiyyət) nümayəndələrindən
istənilən an hesabat tələb etməyə borcludur.
4. Bir sözlə, ideoloji prinsiplər üzrə həmrəylik göstərmək
VƏTƏNDAŞın borcudur.
BİRGƏ RAZILAŞMAnı (onun müddəalarını) qəbul edən
istənilən insan (fərd), VƏTƏNDAŞ həmin razılaşmanın hər bir müddəasını öz yaşam
tərzində həyata keçirməyə borcludur. Yəni, Mən, Sən və O, BİRGƏ RAZILŞAMAya
(insan hüquq və azadlıqlarına, ədalətə) əsaslanan xoşbəxt bir həyat istəyiriksə,
ilk növbədə özümüz bu dəyərlərə, tezislərə sadiq olmalıyıq və həmin razılaşmanı
qəbul edən hər kəsdən bunu (kimliyindən asılı olmayaraq) tələb etməliyik. Əgər
bu dəyərlərə sədaqət göstərməyib BİRGƏ RAZILAŞMAnın müddəalarını pozası olsaq,
dərhal cəzalandırılmalıyıq.
VƏTƏNDAŞ KİMLİYİ haqqında yazmazdan qabaq “kimlik”
sözünün özünü izah edək. Kimlik bizim hər hansısa bir öhdəliklərimiz, vəzifəmiz,
işimiz, mövqeyimizlə və s. əlaqadar olan statusumuz deməkdir (yəni, bizim hər
hansısa bir istiqamətə uyğun funkisonal vəzifə öhdəçiliyi daşımağımızdır). Bir
şəxs müxtəlif kimliklərlə təmsil oluna bilir.
Məsələn, mən kimisə öyrədirəmsə, dərs aparıramsa,
bu, mənim müəllim kimliyim olur. Maşın sürürəmsə, sürücü kimliyi daşıyıram. Xəstəni
müalicə edirəmsə, həkim kimliyim var, valdeynlərim qarşısında övlad kimliyi
daşıyıram və s. DÖVLƏTLƏ qarşılıqlı münasibətlər kontekstində olan öhdəçiliyimiz
də bu kimliklərdən biridir.
Beləliklə, BİRGƏ RAZILAŞMA əsasında qurduğumuz
DÖVLƏTlə bağlılığımızı bildirən statusumuz, kimliyimiz VƏTƏNDAŞ KİMLİYİdir. Mən,
Sən və O, bu VƏTƏNDAŞ KİMLİYİNİ (KİMLİYİMİZİ)
RAZILAŞMAya uyğun qurduğumuz DÖVLƏTlə qarşılıqlı öhdəçilik və vəzifələrimizi,
hüquqlarımızı, azadlıqlarımızı təsbitləyən (təsdiqləyən) Ali kimlik olaraq qəbul
edirirk.
İnsan (fərd) olma kimliyimizdən savayı bütün digər
kimliklər ondan aşağı statusda dayanır. Yəni VƏTƏNDAŞ KİMLİYİmiz etnik, dini,
irqi, cinsi, sosial, ictimai, regional və s. kimliklərdən yuxarı statusdadır. Sadə
şəkildə desək, birinci bizim insan (fərd) kimliyimiz gəlir. İnsan (fərd)
olmağımız Ən Ali kimlikdir. Buna görə də, İnsan (fərd) hüquq və azadlıqları ən
ali sənədimiz olan BİRGƏ RAZILAŞMA (QANUNLAR) ilə qorunur.
İearxiyanı belə müəyyən edə bilərik: Birinci Ən ali
kimlik İnsan (fərd) kimliyi, ikinci Ali kimlik VƏTƏNDAŞ KİMLİYİ və üçüncü digər
kimliklərdir (etnik, dini, cinsi, irqi və s.).
Beləliklə, Mən, Sən və O, yəni biz (cəmiyyətin üzvləri)
VƏTƏNDAŞ KİMLİYİNİ Ali kimlik olaraq qəbul etdiyimizə görə, VƏTƏNDAŞın üzərinə
düşən bütün öhdəlikləri canla-başla yerinə yetirməyə borcluyuq. Başqa cür desək,
VƏTƏNDAŞ KİMLİYİ daşıyan hər kəs başda BİRGƏ RAZILAŞMA və onun əsasında
hazırlanan Ana yasa (Konstitutsiya), eləcə də digər qanunların tələblərinə əməl
etməliyik, əks halda cəzalandırılmalıyıq.
VƏTƏNDAŞ KİMLİYİNİ könüllü şəkildə qəbul edən hər kəsə
(VƏTƏNDAŞLIQdan imtina hüququ da var), Mən, Sən və Ona (cəmiyyət üzvlərinə) digər
kimlikləri (etnik, dini, irqi və s.) üstün tutmaq (insan (fərd) kimliyindən
savayı) qadağandır. Bəzi detalar üzrə fikrimizi izah etməyə çalışaq:
1. VƏTƏNDAŞ KİMLİYİ Etnik kimlikdən üstündür. Etnik
ayrı-seçkilik qadağandır. Yəni, Mənim türk, Sənin ləzgi, Onun yəhudi olması o
demək deyil ki, bizim hansımızınsa etnik kimliyi digər birimizdən azacıq da
olsa üstündür, yaxud aşağıdır. İstər Mən, istər Sən, istərsə də Ona öz etnik
kimliyimizi hamımız tərəfindən qəbul etdiyimiz VƏTƏNDAŞ KİMLİYİndən üstün
tutmaq qəti qadağandır (bu, heç də o demək
deyil ki, kimsə öz etnik kimliyi ilə fəxr edə bilməz. Əlbəttə, hər kəs istəsə
öz etnik kimliyi ilə öyünə bilər, lakin digər etnik qruplardan üstünlüyünü
iddia edib qarşıdurma yarada bilməz). Buna əməl etməyənlər mütləq cəzalandırılmalıdır.
Çünki bir etnik qrupun özünü digər etnik qrupdan üstün tutması faktiki olaraq, əslində
Mən, Sən və Onun, yəni bizim VƏTƏNDAŞ KİMLİYİmizə (VƏTƏNDAŞLIQ İNSTİTUTUna)
qarşı yönəlmiş, sülhü məhv edə biləcək ağır bir təhdidir və cəzası qaçılmazdır.
2. VƏTƏNDAŞ KİMLİYİ Dini (İnanc) kimlikdən
üstündür. Dini (inanc) ayrı-seçkilik qadağandır. Yəni, Mənim müsəlman, Sənin
xristian, Onun ateist olması o demək deyil ki, bizim hansımızınsa dini (yaxud
inancı) kimliyi başqa birimizdən azacıq da olsa üstündür. İstər Mən, istər Sən,
istərsə də Ona öz dini (inanc) kimliyimizi hamımız tərəfindən qəbul etdiyimiz
VƏTƏNDAŞ KİMLİYİndən üstün tutaraq başqalarına sırımağa çalışmağımız qəti qadağandır. Hər kəs sərbəst şəkildə istədiyi
dinə sitayiş edə bilər və yaxud heç bir dinə ibadət etməyə də bilər (ateist ola
bilər). Heç bir dini kimlik digərindən üstün tutula bilməz. Dini ayrı-seçkilik
salan kəs mütləq cəzalandırılmalıdır. Çünki bir dini qrupun özünü digər dini
qrupdan üstün tutması faktiki olaraq, əslində Mən, Sən və Onun, yəni bizim
VƏTƏNDAŞ KİMLİYİmizə (VƏTƏNDAŞLIQ İNSTİTUTUna) qarşı yönəlmiş, sülhü məhv edə
biləcək ağır bir təhdidir və cəzası qaçılmazdır (Dinlə əlaqədar növbəti
yazılarda ətraflı bəhs edəcəyik).
3. VƏTƏNDAŞ KİMLİYİ cinsi kimlikdən üstündür. Cinsi
ayrı-seçkilik qadağandır. Yəni, Mənim kişi, Sənin qadın, Onun cinsi azlıq nümayəndəsi olması o demək deyil ki, bizim hansımızsa
başqa birimizdən üstün (yaxud aşağı) mövqedədir. Cinsi kimliyi hamımız tərəfindən
qəbul etdiyimiz VƏTƏNDAŞ KİMLİYİndən üstün tutmaq qəti qadağandır. Buna əməl etməyənlər mütləq
cəzalandırılmalıdır. Bir cinsin nümayəndəsinin digərindən özünü üstün tutması
faktiki olaraq, əslində Mən, Sən və Onun, yəni bizim VƏTƏNDAŞ KİMLİYİmizə (VƏTƏNDAŞLIQ
İNSTİTUTUna) qarşı yönəlmiş, sülhü məhv edə biləcək təhdidir (bu barədə növbəti
yazılarda ətraflı bəhs olunacaq).
4. VƏTƏNDAŞ KİMLİYİ Regional kimlikdən üstündür.
Regional ayrı-seçkilik qadağandır. Yəni, Mənim Bakılı, Sənin Şəkili, Onun Ləkili
olması o demək deyil ki, bizim hansımızsa regional kimliyə görə başqa birimizdən
üstün (yaxud aşağı) tutulmalıyıq. Əlbəttə, kimsə öz doğulduğu bölgə ilə öyünə
bilər. Lakin bunu qabardıb VƏTƏNDAŞ KİMLİYİndən üstün edə bilməz. Regional ayrı-seçkilik salanlar mütləq cəzalandırılmalıdır. Çünki bir
regionun digərindən üstün tutulması faktiki olaraq, əslində, Mən, Sən və Onun,
yəni bizim VƏTƏNDAŞ KİMLİYİmizə (VƏTƏNDAŞLIQ İNSTİTUTUna) qarşı yönəlmiş, sülhü
məhv edə biləcək bir təhdidir və cəzası qaçılmazdır.
5. VƏTƏNDAŞ KİMLİYİ Tayfa (qohum) kimliyindən
üstündür. Tayfabazlıq (Qohumbazlıq) qəti qadağandır. Yəni, Mənim Əliyevlər, Sənin
Vəliyevlər, Onun Pirvəliyevlər tayfasından olması o demək deyil ki,
hansımızınsa tayfa (qohum) kimliyi digərlərindən azacıq da olsa üstündür.
İstər Mən, istər Sən, istərsə də Ona öz tayfa
(qohum) kimliyini hamımız tərəfindən qəbul etdiyimiz VƏTƏNDAŞ KİMLİYİndən üstün
tutmaq qəti qadağandır və buna əməl etməyənlər mütləq cəzalandırılmalıdır.
Çünki bir tayfanın özünü digər tayfadan üstün tutması (yəni, tayfabazlıq,
qohumbazlıq) faktiki olaraq, əslində, Mən, Sən və Onun, yəni bizim VƏTƏNDAŞ
KİMLİYİmizə (VƏTƏNDAŞLIQ İNSTİTUTUna) qarşı yönəlmiş, sülhü məhv edə biləcək ağır
bir təhdidir və cəzası qaçılmazdır. Və s.
Qeyd: Hörmətli oxucular,
bu cür nümunələri özününüz də düşünüb tapa bilər, yaza bilərsiniz. Əsas modeli
sizə təqdim etmişəm. Həvəsi olub öz nümunələrini yazanlar mənə də göndərsə
sevinərəm və hansısa bir formada saytda yerləşdirə bilərəm.
Nəhayət, üçüncü sualı aydınlaşdırmağa çalışaq. Görək
VƏTƏNDAŞLIQ İNSTİTUTUnu necə formalaşdırmaq olur. VƏTƏNDAŞLIQ İNSTİTUTU
ayrı-ayrı çoxşaxəli istiqamətlər üzrə yaradılan və fəaliyyət göstərən VƏTƏNDAŞ
BİRLİKLƏRİnin məcmusudur. Bu birliklər VƏTƏNDAŞLIQ İNSTİTUTUnu daima ayaqda
saxlayan vacib amildir. Cəmiyyətdə istənilən sahədə VƏTƏNDAŞ BİRLİKLƏRİnə ciddi
ehtiyac var və bu ehtiyacı ödəmək üçün belə birliklərin VƏTƏNDAŞlar tərəfindən
yaradılması sözü gedən institutu qoruyub saxlamaq nöqteyi-nəzərindən zəruridir.
Bir sıra VƏTƏNDAŞ BİRLİKLƏRİ modelləri təklif edə bilərik. Məsələn,
1. Elm və təhsil sahəsində,
1.1. Tələbə hüquq və azadlıqlarının müdafiəsi
Birliyi;
1.2. Magistrantların hüquq və azadlıqlarının müdafiəsi
Birliyi;
1.3. Doktorantların hüquq və azadlıqlarının müdafiəsi
Birliyi;
1.4. Elmi işçilərin hüquq və azadlıqlarının müdafiəsi
Birliyi;
1.5. Müəllimlərin hüquq və azadlıqlarının müdafiəsi
Birliyi;
1.6. Gənc alimlərin hüquq və azadlıqlarının müdafiəsi
Birliyi;
1.7. Alimlərin hüquq və azadlıqlarının müdafiəsi
Birliyi;
1.8. Gənc müəllimlərin hüquq və azadlıqlarının
müdafiəsi Birliyi və s.
(Hörmətli oxucu yaradıcı yanaşıb bu sadalamanı N qədər çoxalda bilər).
2. Səhiyyə sahəsində,
2.1. Həkimlərin hüquq və azadlıqlarının müdafiəsi
Birliyi;
2.2. Tibb işçilərinin hüquq və azadlıqlarının
müdafiəsi Birliyi;
2.3. Əczaçıların hüquq və azadlıqlarının müdafiəsi
Birliyi;
2.4. Rezidentlərin hüquq və azadlıqlarının müdafiəsi
Birliyi və s.
(Hörmətli oxucu yaradıcı yanaşıb bu sadalamanı da N
qədər çoxalda bilər).
3. İctimai sosial sahədə,
3.1. İşsizlərin hüquq və azadlıqlarının müdafiəsi
Birliyi;
3.2. Əlillərin hüquq və azadlıqlarının müdafiəsi
Birliyi;
3.3. Fəhlələrin hüquq və azadlıqlarının müdafiəsi
Birliyi;
3.4. Qadınların hüquq və azadlıqlarının müdafiəsi
Birliyi;
3.5. Uşaqların hüquq və azadlıqlarının müdafiəsi
Birliyi;
3.6. Ahılların hüquq və azadlıqlarının müdafiəsi
Birliyi;
3.7. Yoxsulların hüquq və azadlıqlarının müdafiəsi
Birliyi;
3.8. İşçilərin hüquq və azadlıqlarının müdafiəsi
Birliyi;
3.9. Uşaqlı qadınların hüquq və azadlıqlarının
müdafiəsi Birliyi;
3.10. Azad sahibkarların hüquq və azadlıqlarının
müdafiəsi Birliyi və s.
(Hörmətli oxucu yaradıcı yanaşıb bu sadalamanı da N
qədər çoxalda bilər).
Qeyd etdiyimiz kimi, bu birliklər VƏTƏNDAŞLIQ
İNSTİTUTUnun sütununu təşkil etdiyindən onların yaradılması və fəaliyyəti son dərəcə
labüddür. Əgər Mən, Sən və O, yəni biz (cəmiyyət üzvləri) özümümüzün hüquq və
azadlıqlarımızı, haqlarımızı daima qoruyub mühafizə edərək, xoşbəxt yaşamaq istəyiriksə,
mütləq və mütləq bunu birgə etməliyik (tək əldən səs çıxmaz). Bunun üçün də
birinci özümüzdən başlamalıyıq (bax: https://ramin-n.tr.gg/).
Mən VƏTƏNDAŞ
bilməliyəm ki, bu gün Sən və O VƏTƏNDAŞın haqları, hüquqları və azadlıqları
tapdalanırsa, bu elə o deməkdir ki, Mənim özümün haqlarım, hüquq və
azadlıqlarım tapdalanır.
Bir VƏTƏNDAŞ digər VƏTƏNDAŞı niyə müdafiə etməyə
borcludur? İlk növbədə, ona görə ki, əslində o, özünü qorumaq üçün bunu etməlidir.
Çünki o, özü də VƏTƏNDAŞ olduğundan başqa VƏTƏNDAŞa aid hüquq və azadlıqlar ona
da şamil olunur. Ona görə də, o, digər VƏTƏNDAŞın hüquqlarını, azadlıqlarını
müdafiə etməklə özünün hüquq və azadlıqlarını qorumuş olur.
Bu səbəbdən də, əgər bir VƏTƏNDAŞın haqları, hüquq
və azadlıqları DÖVLƏT (Hökumət, HAKİMİYYƏT) nümayəndələri tərəfindən pozulursa,
digər VƏTƏNDAŞLAR mütləq birgə formada, komanda olaraq BİRGƏ RAZILAŞMA (QANUNLAR)
çərçivəsində həmin kəslərin vəzifəsindən kənarlaşdırılaraq cəzalandırılmasına
nail olmalıdırlar.
VƏTƏNDAŞLIQ İNSTİTUTUnun əsas prinsipi – GÜC
BİRLİKDƏDİR.
Ramin Allahverdi
Comments
Post a Comment