19. BİRGƏ RAZILAŞMA VƏ LİDER (LİDERLİK)
19.
BİRGƏ RAZILAŞMA VƏ LİDER (LİDERLİK)
Əvvvəlcə
LİDER (LİDERLİK) məfhumunun mahiyyətini aydınlaşdırmağa çalışaq. Sadə bir nümunəyə
nəzər salaq: Tutaq ki, biz üç dost mən, sən və o, bir günlük şəhər ətrafı
istirahətə getmək üçün bir araya gəlirik. Görüşərkən məlum olur ki, gedəcəyimiz
yerlə bağlı fikirlərimiz fərqlidir. Yəni Mən Göygölə, Sən Nabrana, O isə Qəbələyə
getməyi təklif edir. Lakin qısa müzakirədən sonra mənim təklif etdiyim Göygölə
istirahətə yollanırıq. Bu sadə misalda göstərilən situasiyada təklifim keçərli, daha inandırıcı olduğuna görə
LİDER mənəm. Yəni LİDERLİK məfhumunu anlamaq o qədər də qəliz deyil, göstərdiyim
nümunədəki kimi formulaca, model olaraq sadədir.
İndi isə LİDERi
səciyyələndirən əsas başlıca keyfiyyətləri ayırd edək:
1. LİDER - ilk
növbədə gələcəklə bağlı aydın baxışı, vizyonu olan şəxsdir, fərddir. Bu anlamda LİDER aydın bir ideologiya
ortalığa qoyur və yaxud inandığı, doğru bildiyi mövcud ideologiyalardan birinə yiyələnib
yaradıcı şəkildə yanaşır, onu daha da inkişaf etdirir, eyni zamanda həmin ideologiya
ətrafında başqalarını da cəm edə bilir. Elə buna görə də, hər zaman yenilik
yaratmaq potensialında, təşəbbüsündə olan, məqsədyönlü dəyişimə hazır şəxs sayılan
LİDER özü üçün tam aydın bir ideologiyaya (ideyalar, prinsiplər, dəyərlər və
s.), onun doğruluğuna bütün varlığı ilə inanaraq, yüksək əminliklə bu istiqamətdə
cəsarətlə addımlayır və arxasınca minlərlə insanın gəlməsinə səbəbkar olur.
2. LİDER - əmin
olaraq, inanaraq gətirmək istədyi ideyalara, prinsiplərə, bəlli (əxlaqi-mənəvi) dəyərlərə ilk növbədə özü
yüksək dəqiqliklə əməl etməli, sözü-əməli bir-birini tamamlamalı, davranışında,
yaşam tərzində və s. şəxsi timsalında nümunə olmalıdır. Onun üçün gətirmək istədiyi
ideoloji-prinsp və dəyərlər hər kəs daxil olmaqla ayrı-ayrı istənilən fərdin şəxsi
maraqlarından üstün mövqedə olmalı, hətta özü bilməyərəkdən həmin dəyər və
prinsipləri pozubsa, səhvini boynuna almağı, layiqli cəzanı çəkməyə könüllü
razı olmağı bacarmalıdır. O, ətrafındakı insanlara, topluma, kollektivə qarşı
dürüst, səmimi olmalı, heç də özünü ideallaşdırmamalı, bütləşdirməməli, əgər
uğursuzluğu olubsa, onu etiraf etməyi bacarmalı, bundan dərs çıxarmalıdır və hər
zaman ədalətli olmalıdır.
3. LİDER - hər
zaman hər şeyi sorğulayan, istənilən bir məsələyə kor-koranə deyil, rasional
yanaşan, analiz (təhlil) edərək öz təfəkkür süzgəncindən keçirən, strateji
düşünməyi bacarandır. LİDER daima öyrənməli, biliklərini dərinləşdirməli, öz üzərində
işləməlidir və zamanın, dövrün nəbzini tutaraq nəinki adekvat şəkildə proseslərə
reaksiya vermək iqtidarında olmalı, həmçinin onu qabaqlamağı bacarmalıdır. Buna
elmi ədəbiyyatda İntellektual liderlik də deyilir. O, fərqindəlik yaradır, digərlərinin
də qutudan, çərçivədən kənarda düşünməyinə
vəsilə olur. Və ya başqa cür desək, LİDER ətrafındakı insanları onların təfəkkür
tərzini ənənəvi daşlaşmış qəlblərdən, çərçivələrdən kənara çıxardaraq düşünməyə
sövq edir (Məsələn: mövcud durumu, daşlamış dəyərləri, mentaliteti və s. çəkinmədən
sorğulamaq və s.).
4. LİDER
potensialı olanları daima irəliyə çıxarmalı və onların yeni liderlərə çevrilməsinə
hər cür dəstək verməli və şərait yaratmalıdır. Ətrafındakı insanlara, komanda
üzvlərinə özünə inamı (istəyən hər kəsin bacarıqlı olacağına, lider ola biləcəyinə
və s.) aşılamalı, onları motivə etməli və özgüvənini yaratmalıdır.
5. LİDER - ən
azı toplumun bəlli bir hədəflədiyi kəsimini arxasınca aparmağı bacarmalıdır. Əgər
bunu edə bilmirsə, səhvi başqalarının üstünə atmamalıdır, ona inanmayanları təqsirkar
bilməməlidir, əksinə səbəbləri ilk növbədə özündə, öz üslubunda (səriştəsizliyində,
bacarıqsızlığında və s.) axtarmalıdır.
Məsələn, məmləkətdə əksər partiya rəhbərləri,
həmçinin özlərini siyasətçi hesab edənlər toplumun onları dəstəkləməməsindən
narazılıq edərək camaatı, xalqı ittiham edirlər, günahlandırırlar. Halbuki,
xalq kifayət qədər rasioanal yanaşır (elin gözü tərzidir) və haqlı olaraq da
onlara inanmayır. Çünki bu adamlar özləri çox sadə bir nəsnəni - nə istədiklərini
(hansı ideolji konsepsiyanı təmsil etdiklərini) belə bilmirlər.
6. LİDER heç
də hər zaman öndə olan deyil, lazımi zamanlarda arxa plana çəkilməyi bilən və
prosesləri istənilən mövqedən yönləndirməyi bacarandır.
7. LİDER - istənilən
bir çətinliyi fürsətə çevirməyi bacarmalı və bunu həm də təşviq etməlidir. Lazımi,
zəruri hallarda təkbaşına və eyni zamanda kollektiv şəkildə qərarlar vermək
qabiliyyətinə sahib olmalıdır. LİDER xalqın, digərlərinin problemlərini, istəklərini,
maraqlarını təmkinlə dinləməli və lazımı tədbirləri görməyi bacarmaldır. O, strateji
düşünməli, işləri planlamağı (uzunmüddətli və yaxın müddətli planlamaları
olmaldır) bacarmalı və həmin planlar üzrə taktiki şəkildə hərəkət etməlidir.
Düşünürəm ki,
LİDERi səciyyələndirən keyfiyyətlər barədə ümumiləşdirmələrimiz yetərlidir. Bəs
görək BİRGƏ RAZILAŞMA prizmasından LİDER (LİDERLİK) necə dəyərləndirilir?
BİRGƏ
RAZILAŞMA KONSEPSİYASINA görə (bax: https://birgeraz.blogspot.com/2020/06/1-birg-razilasma-konsepsiyasi.html) bu
ideologiya ümumiyyətlə insan cəmiyyəti üçün ən uyğun, münasib bir ideoloji
konseptdir və birbaşa özü həm də Liderlik statusundadır. Hesab edirəm ki, bu
konsepsiyanın fəlsəfi-ictimai, ictimai-siyasi, fəlsəfi-siyasi məzmunu dərindən
öyrənilməli, mənimsənilməli və sözügedən ideologiya Mən, Sən və Onun, aparıcı cəmiyyət
üzvlərinin istinadgah nöqtəsinə çevrilməlidir.
Bu ideologiyanı dərindən, həm də sorğulayaraq, anlayaraq, yaradıcı
yanaşaraq mənimsəyənlər, özününküləşdirənlər artıq özləri bir LİDER kimi
yetişmiş olurlar. BİRGƏ RAZILAŞMA LİDERLƏR üçün bir çıraq, bir məşəldir.
Ramin Allahverdi
Comments
Post a Comment