BİRGƏ RAZILAŞMA KONSEPSİYASI VƏ FƏRDİN XOŞBƏXTLİYİ
Məxluqə Qasımova
BİRGƏ RAZILAŞMA KONSEPSİYASI VƏ FƏRDİN XOŞBƏXTLİYİ
Fərdin xoşbəxtliyi Mən, Sən, Onun timsalında hər
bir kəsi düşündürən əsas məsələlərdəndir. Xoşbəxtlik bütün insanların
arzuladığı ilkin, eyni zamanda əldə edilməsi o qədər də asan görünməyən ali dəyərdir. İnsanın xoşbəxtliyi onun tələbatları ilə düz
mütənasibdir. Yəni xoşbəxtliyimiz tələbatlarımızın ödənilmə səviyyəsindən
asılıdır.
Vahid, bütöv halında gördüyümüz insan iki hissədən
- fiziki-anatomik və daxili-ruh aləmindən ibarətdir. Bu baxımdan insanın tələbatları
da iki əsas qrupa ayrılır: maddi tələbatlar, mənəvi tələbatlar. Madii tələbatlar insanın fiziki aləminin ehtiyaclarının ödəyicisi
olmaqla bir neçə prosesləri özündə ehtiva edir. Bura aclıq, sağlamlıq, geyim,
istirahət, cinsi tələbatlar və s. kimi proseslər daxildir. İnsanın maddi tələbatının
əsas təminedici vasitəsi puldur (kapitalist cəmiyyətdə belədir). Pul hər şeydir
desək yanılarıq, amma maddi tələbatlarımız üçün pul hər şeydir desək səhv etmiş
olmarıq. İnsan həyatında pul faktoru 2-ci (mənəvi) tələbatda öz əhəmiyyətini itirir. Çünki mənəvi
tələbatımızın əsas ödəyicisi sevgidir. Bəs mənəvi tələbatımızı doyuran sevgi
hardan qaynaqlanır? Öncə nəzərə almalıyıq ki, sevgi geniş anlayışdır. Bizim ruh
aləmimizi təmin edən sevginin əsası valideynlərimizdən, xüsusilə anadan
qaynaqlanır. Eynilə 1-ci tələbatdakı konsepsiyanı burada da qoya bilərik: Sevgi
hər şey deyil, mənəvi tələbatlarımız üçün sevgi hər şeydir.
İnsan doğulan andan onun hər iki tələbatı bu və ya
digər dərəcədə ödənməyə başlayır. Lakin elə şəxslər var ki, onun maddi və
ya mənəvi tələbatı ya ödənmir, ya da kifayət həddə təmin
edilmir. Fikir versək görərik ki, fiziki tələbatı ödənməyən fərdlərin xarici görkəmi
standartlardan aşağı olur və ya minimal həddi aşa bilmir. Görünən əskiklikləri
doldurmaq asandır amma mənəvi tələbatı doyurulmamış fərdləri heç də hamı ilk
baxışdan anlamır. Ödənilməmiş mənəvi tələbatlar insanın ruh aləmində müəyyən mənfi
proseslər yaradır ki, bu insanın psixikasında - nitqində, emosiyalarında,
qeyri-iradi davranışlarında və s. təzahür edir. Dediklərimizə əsasən, xoşbəxtliyin
formulunu belə müəyyənləşdirə bilərik: nS+nP= nX .
Onu da vurğulamalıyıq ki, qeyd etdiyimiz məsələləri
hər tərəfli nəzərə alsaq, azadlıqları təmin edilmiş fərdlərdən ibarət cəmiyyətdə
keçərlidir. Bu azad cəmiyyəti də bizə Birgə Razılaşma Konsepsiyası verir. Fərdin
azadlıqları Birgə Razılaşmanın müddəalarına əsasən formalaşmalıdır.
Birgə Razılaşma Cəmiyyətində xoşbəxtliyi təmin etmək
mümkündür. Lakin cəmiyyət həyatında müəyyən faktorlar nəzərə alınmalıdır ki, fərdin
maddi-mənəvi aləminə bu və ya digər formada mənfi təsir etməsin. İlk növbədə fərd
azadlığını hiss etməlidir. Unutmaq olmaz
ki, azadlıq müəyyən edilmiş sərhədlər daxilində mövcuddur, əksi azadlıq yox
özbaşınalıqdır. Dil, din, cins və irq amilləri nəzərə alınmadan azadlıqla
müvafiq olaraq fərdin mənafeyinə, o cümlədən, Mən, Sən, Ondan ibarət bütünün
xeyrinə uyğun gələcək şəkildə paylanmalıdır. Lakin burada mühüm detala fikir
verilməlidir. Müəyyən şəxs və ya şəxslərin dini baxışı, cinsi oriyentasiyası və
s. Mən, Sən, Onun həyatı üçün maddi-mənəvi təhlükə faktoru daşıyırsa bunun
qarşısı alınmalıdır. Nəticədə müəyyən şəxslərin azadlıqları digərlərinə nisbətdə
məhdudlaşdırıla bilər. Təbii ki, burada Mən, Sən, Onun mənafeyi əsas meyardır.
Birgə Razılaşmada fərd “Mən, Sən, O” na bərabərdir.
Birgə Razılaşma fərdlərdən təşkil olunur lakin, azad və xoşbəxt fərdlərdən.
BRK fərdin xoşbəxtliyinin təmin edilmə
prinsipi üzrə qurulub. Xoşbəxt fərdlərdən xoşbəxt cəmiyyət formalaşdırmaq, nəticə
etibarilə formalaşmış xoşbəxt cəmiyyətdə yeni xoşbəxt fərdlər yetişdirmək
BRK-nin prinsiplərinə uyğun gəlir. Bu konsepsiyanın əsasını Mən, Sən, O yəni
Biz - bizlik şüuru təşkil edir. Birgə
Razılaşmanın qəbul etdiyi və ya edəcəyi istənilən müddəalar Mən, Sən, O - Biz
üçün eyni dərəcədə keçərlidir. Birgə
Razılaşma Konsepsiyasında fərdlər ilk növbədə özlərinin - insanın ali varlıq
olduğunu dərk etməli, öz azadlıqlarının pozulmaz olduğunu bilməlidir. Bütün
bunların eyni zamanda digər fərdlərə də aidliyini, aliliyini anlamalıdırlar. Fərdlərin
şəxsi həyatı toxunulmazdır. Bu fərdin azadlıqlarından biridir ki, fərdin xoşbəxtliyində
mühüm rol oynayır. Nəticə etibarilə, Birgə Razılaşma Konsepsiyası fərdin xoşbəxtliyi
üçün münbit şərait yaradır, lakin bu şəraitdən düzgün istifadə artıq fərdlərin
öz məsuliyyətindədir. Sonda onu qeyd edək ki, xoşbəxtlik əlçatmaz deyil.
Qeyd: Müəllif Məxluqə Qasımova bu məqaləsi ilə
BİRGƏ RAZILAŞMA CƏMİYYƏTİnin “BİRGƏ RAZILAŞMA KONSEPSİYASI fərdin xoşbəxtliyini
təmin edir” adlı yazı müsabiqəsinin iştirakçısı və qaliblərindən
biridir.
Comments
Post a Comment