FEMİNİZMƏ DAİR BİLGİLƏR
FATİMƏ ƏLİZADƏ
FEMİNİZMƏ DAİR BİLGİLƏR
Açar sözlər: feminizm, qadın, qadın və kişi bərabərliyi
Feminizm latın mənşəli “femina”
kəlməsindən əmələ gəlmiş “qadın” deməkdir. Ümumilikdə, feminizm məfhumu bərabərliyi
və toplumsal qruplar arasındakı fərqliliklərin yox edilməsini müdafiə edir.
Feminizm kütləvi anlaşılan kişi düşmənliyi düşüncəsinin əksinə olaraq, cinsiyət
bərabərsizliyini gündəmə gətirən, ön plana qoyan bir cərəyandır. Sadəcə
qadınları deyil, kişiləri də əhatə edən feminizm anlayışı gerçək bərabərliyi
ortaya qoymaq məqsədi güdür. Feminizm deyərkən onun tərəfdarlarınının qadınlar
olduğu ilk ağıla gəlsə də, sözügedən cərəyanı
müdafiə edən kişilər də vardır. Yəni kişilər də eynilə qadınlar kimi bu yanaşmanı
müdafiə edə, dəstəkləyə bilər və gender problemlərinin həll olunması üçün səy
göstərə bilərlər.
Feminizm patriarxal nizama (düzənə) qarşı mübarizə
aparır. Dolayısıyla da bu düzənin cinsi ayrı-seçkilik doğurduğu qaydalara qarşıdır. Feminist olmanın tənha, tək yaşamaq,
kişilərə nifrət etmək kimi şərtləri yoxdur. Çünki feminizm, yalnız bir ədalət axtarışıdır.
“Kişiyə aid bütün hüquq və azadlıqlar qadınlara da istisnasız olaraq şamil
olunmalıdır. Yəni özünün hüquq və azadlıqlarının tapdalanmasını istəməyən kişi
özü ilk növbədə ailəsində olan fərdlərin, xüsusilə də qadınların (anasının, bacısının,
xanımının, qızının və s.) hüquq və azadlıqlarını tanımalı və onları nəinki pozmamalı, həm də hər yerdə müdafiə etməlidir”(1,
s. 46).
Feminizmin meydana gəlişi qadın
haqları ilə əlaqəli olsa da, sadəcə bununla kifayətlənməmiş, həm də gender bərabərliyini
müdafiə etmişdir. Ayrıca irqçiliyə qarşı mübarizə kimi önəmli insan haqları məsələlərin
də inkişaf etməsinə təsir göstərmişdir.
Feminizmin tarixi. Feminizm anlayışı ilk
olaraq filosof Çarlz Furer (Charles
Fourier (1772-1837)) tərəfindən istifadə
olunmuşdur. O, sosial olaraq inkişafın tək yolunun, qadınlara daha çox azadlıq
verilməsi olduğu fikrini müdafiə etmişdir. Feminizmin üç əsas dalğası olmuşdur:
Birinci dalğa 19-cu əsrin ortalarından 20-ci əsrin əvvəllərinə qədər davam edib
və daha çox səsvermə hüququ, mülkiyyət hüququ, təhsil almaq, işləyə bilmək
imkanı və ədalətli nikah qanunu uğrunda mübarizəni əhatə edib. 1960-cı illərdən
başlayan ikinci dalğa zamanı isə diqqət mərkəzində əmək münasibətləri və
reproduktiv hüquq olub. Bu dövrdə feminizm hərəkatı üçün mühüm olan iş yerlərində
və təhsil müəssisələrində ayrı-seçkiliyin aradan qaldırılması, o cümlədən abort
ilə bağlı tarixi qərarlar qəbul edilib. Hal-hazırda biz plüralist və müxtəliflik
üzərində qurulan feminizmin 3-cü dalğasını müşahidə edirik. Bu dövrdə feminizm
daha geniş kütləni əhatə etməyə başladı və diqqətini əsasən qloballaşma,
texnologiya və qadınların həyatına təsir edən digər dəyişikliklərə yönəltdi.
Onu da qeyd etmək lazımdır ki, müasir feminizm qadınların seçim hüququna əhəmiyyət
verir. Müasir feministlər inanırlar ki, istənilən qadının iddialı və ya ənənəvi
həyat tərzi sürmək seçimi olmalıdır. Burada əsas məqam, qadının nə seçdiyi
deyil, istədiyini seçə bilməsidir.
Feminizmin növləri. Feminizm ideyası ilk
baxışdan sadə görünsə də, çoxları bu hərəkatın məqsədini fərqli anlayır. Bunun əsas
səbəblərindən biri feminizmin müxtəlif növlərinin mövcud olmasıdır. Qadınlarla
kişilərin bərabər sosial, siyasi və iqtisadi imkanları olması uğrunda mübarizə
aparır. Feminizmin digər bir növü sosialist feminizmidir. Bu istiqamət xüsusi
mülkiyyət və cəmiyyətin sinfi quruluşunu qadınların ayrı-seçkiliyə məruz
qalmasının əsas səbəbi kimi görür.
Feministlər arasında ən kəskin
mövqeyə malik olanlar radikal feministlərdir. Onlar bildirirlər ki, kişilərin
dominantlıq etdiyi cəmiyyət qadınlara zülm verir və bu səbəbdən cinslər
arasında həqiqi bərabərlik olması üçün patriarxal cəmiyyət məhv edilməlidir.
Başqa bir maraqlı qrup isə mədəni feministlərdir. Onlar müasir cəmiyyətin
aqressivlik və davamlı rəqabət kimi maskulin davranış nəticəsində məhvə doğru
getdiyini və bu səbəbdən cəmiyyətin qayğı, dəstək və əməkdaşlıq kimi feminin
davranışdan faydalana biləcəyinə inanırlar.
Qədim Türk mədəniyyətində və
digər millətlərdə qadın. Azərbaycan bir Türk Oğuz ölkəsidir və bizlər də köklü
bir keçmişə sahib Oğuz türkləriyik. Türk tarixində qadın, xatun və ya xanım dəyərlidir
və əvəzedilməzdir. Dünya tarix səhifələrini incələsək, qadına türklər qədər dəyər
verən və ucaldan ikinci bir millətin olmadığını çox aydın bir şəkildə görə bilərik.
Məsələn, Çinlilərdə qadın insan sayılmaz və ad belə verilməzdi. Qız uşaqlarına
da ad verməyə ehtiyac duymaz, bir, iki, üç şəklində çağırardılar. Ömrü boyunca
qadınlar bir kişinin tabeçiliyində yaşamaq məcburiyyətində idi. Qadın xidmətçi
sayılır, həyat yoldaşı və uşaqları ilə
eyni süfrədə otura bilməzdi. Ayaqda dayanıb onlara xidmət etmək məcburiyyətində
idi.
Farslarda qadın kişiyə itaət
etmək məcburiyyətində qalırdı. Bir kişinin birdən daha çox qadınla evlənməsi
normal qarşılanırdı. Sasani İranında fars kişilər qan bağının nikaha mane
olmaması səbəbi ilə ana və bacıları ilə evlənə bildikləri kimi, bu mövzuda da təşviq
edilirdi.
Ərəblərin
cahiliyə dönəmində qız uşaqlarının torpağa diri-diri basdırılması tarixi bir
gerçəkdir. Qız uşağına sahib olmaq başıaşağılıq olaraq görülürdü. Hətta
Buddizmin qurucusu Budda, ilk zamanlar qadınları dinə qəbul etməmişdir. Qədim
Yunanlarda da qadının bir dəyəri olmamışdır. Qadın eyni bir əşya kimi alınıb
satılır və miras olaraq bağışlana bilərdi. Slavyanlarda (ruslarda) qadın əşya olaraq qəbul
edilirdi. Slavyan ailəsindəki uşaqlara da əsir kimi baxılırdı. Ruslar həyat yoldaşı
ölən qadını da onunla birlikdə basdırırdılar.
Türklərdə ailənin təməli qadındır. Bu miladdan
öncə də belə idi. Avropa, Afrika və Ərəbistandakı qadınlar kölə olaraq satılarkən
türk qadınları hər zaman hür və azad olmuşdur. Qədim türklərdə qadın ailədə söz
sahibi olduğu qədər siyasi və iqtisadi əlaqələrdə dövlət yönətimində də söz
sahibi olmuşdur. Qadınlar qılıncını yaxşı istifadə edər, ata minər və güləşərdilər.
Hətta onlar savaşa da qatılırdılar. Bunlar tarixi gerçəklikdir. Buna görə də
qadınları gücsüzlük və zəiflikdə ittiham etməzdən əvvəl Qədim türk tarixinə nəzər
yetirməkdə fayda var. Fərqli millətlərdə qadınlara verilən dəyəri xatırladıqdan
sonra aydın şəkildə, türk milləti qədər qadınlara dəyər verən ikinci bir millətin
olmadığını görmək mümkündür.
Xarici və milli ədəbiyyatda
qadının yeri. Feminist yazarlar arasında ən diqqət çəkən isimlərdən
ilki Virginiya Volfdur (Virginia Woolf). Volf akademik təhsil ala bilməsə də, evlərində olan atasına
aid kitabları mütailə etməklə özünü inkişaf etdirmişdir. “1920-ci ildə
yayımlanan Gecə və Gündüz adlı romanında Volf qadın haqqları, sinfi fərqlilik,
evlilik və azadlıq kimi mövzuları detallı şəkildə vurğulamışdır. 1929-cu ildə
yayımlanan “Özünə aid bir otaq” əsəri feminist hərəkatın klassik kitablarından hesab
olunur. Volf həmin əsərində qadının ədəbiyyatdakı varlığına ayrıca yer
vermişdir.
Azərbaycan xalqının mənəvi
sərvəti olan “Kitabi-Dədə Qorqud” dastanında verilən qəhrəman və vətənpərvər
kişi obrazları Bayandur, Qazan xan, Dəli Domrul, Uruz, Bozaltı Beyrək,
Qanturalı, Buğac, Qaraca çoban və başqaları ilə yanaşı Burla xatun, Banuçiçək,
Selcan xatun kimi qadın obrazları da əsas yer tutur. “Kitabi-Dədə Qorqud”
eposunda qəhrəmanlıq və vətənpərvərlik duyğularının əhəmiyyətindən danışarkən
qoçaq Oğuz igidləri ilə yanaşı heç də onlardan geri qalmayan qadın obrazlarına
xüsusi diqqət ayırmaq lazım gəlir. Bu mənada xalqımızın daim işlətdiyi bir
aforizmi istifadə etmək yerinə düşər; “Aslanın erkəyi-dişisi olmaz”. Dastanda
bütün dastan boyu qadınlar cəmiyyətin bir üzvü kimi qəbul olunur və yüksək qiymətləndirilir.
Öz qoçaqlığı, mərdliyi, qəhrəmanlığı ilə kişilərdən heç də geri qalmırlar. Vətənpərvərlik,
övlada məhəbbət, ata-anaya hörmət bəsləyirlər.
Əsərdə daha çox diqqəti cəlb edən və bir çox mətləblərin ideya
daşıyıcısı olan qadın obrazları mövcuddur. Burla xatun, Banuçiçək, Selcan
xanımdan başqa eposda bir neçə qadın obrazlarının olduğu da qabarıq formada
özünü büruzə verir. Həmin qadınların yeri və mövqeyi dastanın strukturunda
görünür. Bu cərgəyə, Dirsə xanın, Dəli Domrulun və Səyrəyin xanımlarını əlavə
etmək olar. “Qazan xanın oğlu Uruz düşmən tərəfindən əsir götürülərkən, uca
boylu Burla xatun onu qurtarmağa gedən yoldaşının arxasınca düşmənlə vuruşmağa
yollanır. Yaralanmış yoldaşına döyüş meydanında yetişən Burla xatun özünə məxsus
ad-sanla qəhrəmanlarla birlikdə vuruşur hünər və şücaət göstərir”(3).
Eposun müxtəlif boylarında
təsvir olunan hadisə və əhvalatlarla birbaşa əlaqədə olan bu xanımlar əsərdə qəhrəman
qadınlar kimi görünürlər və tipik Azərbaycan qadını obrazını formalaşdırırlar. “Kitabi-Dədə
Qorqud”eposundakı Salur Qazan xanın və Dirsə xanın xanımlarından başqa, Banuçiçək
və Selcan xatun obrazları da qəhrəman qadın kimi təsvir olunur. Məsələn,
dastanda Banuçiçəyi əri ilə birlikdə döyüş meydanlarında döyüşlərdə görürük.
Azərbaycan şairi Hüseyn
Cavidin yaradıcılığında qadın problemi, ailədə və cəmiyyətdə qadına münasibət,
qadının yeri və rolu məsələsi mühüm yer tutur. “Mənim
tanrım gözəllikdir, sevgidir”, deyən şairi Azərbaycan və ümumiyyətlə Şərq
qadınının acı taleyi düşündürməyə bilməzdi. Demək olar ki, Cavidin elə bir əsəri
yoxdur ki, orada qadınla bağlı bu və ya digər məsələyə toxunulmasın və bu məsələyə
şair öz münasibətini bildirməsin. İyirmi iki pyes və yüzlərlə poema və şeirlərin
yaradıcısı olan H. Cavidin əsərlərinin çoxu bilavasitə qadın adı ilə
adlandırılmışdır (Afət, Maral, Şeyda, Şəhla və s.). Cavidin təsvir etdiyi
qadınlar müxtəlif millətlərə və zümrələrə aiddirlər və bir-birlərindən bir çox
cəhətdən fərqlənirlər. Şair əsərlərində müasir qadınların cəmiyyətdə və məişətdə
vəzifəsi məsələsi ilə yanaşı, uzaq keçmişdə Şərq qadınlarının ağır həyatını da
təsvir edir. lakin istər müasir, istərsə keçmişdə yaşamış qadınları təsvirində
Cavidin üsyankar, barışmaz, romantik ruhu özünü göstərir, onun qadına münasibəti,
qadın məsələsinin həlli ilə bağlı fikir və düşüncələri əks olunur
Qadın, ey sevimli həmşirə
oyan,
Ana, ey nazlı qadın, qalx
yuxudan!
Sənin aləmdə vəzifən, hissən,
Nə böyük, həm nə ağırdır,
bilsən?!
Qadın! Ey sevgili şəvqətli
mələk!
Bu qədər səbri-təhəmmül nə
demək?
O lətafət, o nəcabətlə sana
Bu əsarət, bu həqarət nə rəva?
(4)
“Qadın” şeirində Cavid, cəmiyyətdə
ləyaqəti amansızca alçaldılan, bütün insan hüquqlarından məhrum olan qadına, onun
haqqlarını, cəmiyyətdə layiq olduğu yeri qaytarmağın zəruriliyi fikrini ifadə
edir. Aşağıdakı şeirdə o, M. Hadi kimi qətiyyətlə çadraya qarşı çıxır, onu “zülmətin
pərdəsi”adlandırır:
Olıyor iştə hüququn pamal
Çalış, öyrən, ara, bul, həqqini
al!
Pərdeyi-zülmət içindən
sıyrıl!
Qəhrəmanlar kimi qavğaya
atıl!
Nəticə. Feminizm hərəkatı əhəmiyyətli
dəyişikliklərə nail oldu. Bu hərəkat sayəsində, qadınlar səs verə, mühüm siyasi
postlar tuta, ənənəvi olaraq kişilərin gördüyü işləri görə bilirlər. Lakin təəssüf
ki, mübarizə hələ bitməyib. Dünyanın bir çox yerində, öz ölkəmizdə də qadınlar
hələ də konservativ patriarxal cəmiyyətin qurbanlarıdır və nə qədər ki, bu
status-kvo dəyişməyib, feminizm hərəkatı da aktual olmaqda davam edəcək.
ƏDƏBİYYAT
1. Ramin Allahverdi. Birgə razılaşma konsepsiyası.
Bakı: Elm və təhsil, 2021, 162 s.
2. Virginia Woolf. Gecə və gündüz və özünə
aid bir otaq. Bakı: Teas Press, 2022, 216
s.
3. Kitabi-Dədə Qorqud “Qazan xanın oğlu Uruzun
əsir götürüldüyü boy”. Bakı: 2017, 208 s.
4. Hüseyn
Cavid. “Qadın” şeiri. Bakı: Çaşıoğlu, 2014, 173 s.
Comments
Post a Comment