16. BİRGƏ RAZILAŞMA və MÜXALİFƏT
Bu
yazıda iki mühüm məsələyə aydınlıq gətirməyə çalışacağıq:
1.
MÜXALİFƏT nədir?
2.
BİRGƏ RAZILAŞMAya əsaslanan cəmiyyətdə MÜXALİFƏT necə olmalıdır?
1. Cəmiyyətimizdə insanın (Fərdin) AZADLIĞInı anlada biləcək bir sıra məfhumlar
kimi MÜXALİFƏT anlayışı da həqiqi məzmununa müvafiq biçimdə deyil, müxtəlif maraqlı qüvvələrin istəklərinə uyğun
şəkildə təhrif olunmaqla izhar edilməkdədir. Bəs əslində məsələ necədir?
MÜXALİFƏT
- ilk növbədə cəmiyyətin (eləcə də dövlətin, hakimiyyətin və s.) idarə olunması
ilə bağlı özünün müfəssəl, aydın ideologiyası (ideoloji konsepti, gələcəklə
bağlı əsaslı konsepsiyası) olan, eyni zamanda həmin ideologiyaya əsaslanaraq, ətrafında
sosial dayaq toplaya bilən və hər an ortalığa çıxmağa qadir alternativ bir
siyasi qüvvədir, gücdür.
İstənilən
cəmiyyətdə MÜXALİFƏTin varlığı, mövcud olub-olmaması 3 mühüm amillə şərtlənir.
1.
MÜXALİFƏT müfəssəl, aydın bir ideologiyaya sahib olmalıdır;
2.
MÜXALİFƏT öz ideologiyası ətrafında sosial baza formalaşdırmağı və ideologiyaya
əsaslanan ALTERNATİV SİSTEM kimi meydana çıxmağı bacarmalıdır;
3.
MÜXALİFƏT dəqiq müəyyən edilmiş hədəfə və ona çatmaq üçün yetərli strategiyaya,
taktiki gedişlərə malik olmalıdır.
Göstərilən
bu 3 amilin yoxluğu hər hansısa bir ölkədə MÜXALİFƏTin faktiki olmamasına dəlalət
edir. Deməli, burada MÜXALİFƏTdən yox, onun imitasiyasından danışa bilərik.
Bəs
MÜXALİFƏTİ imitasiya etmək nə deməkdir? Bu kimə və nə üçün lazımdır? Əlbəttə,
ölkə daxilində və beynəlxalq aləmdə demokratik legitimliyini nümayiş etdirmək
üçün yalançı da olsa, MÜXALİFƏTin (imitasiyalı olsa da) mövcudluğu, ilk növbədə İQTİDARın özünə lazımdır. Xüsusilə, üzdə
demokratik görsənməyə çalışan, lakin mahiyyətcə avtoritar idarəetmələrdə bütün
prosesləri nəzarətdə saxlaya bilməsi üçün onlara yalnız və yalnız tam nəzarət
edə biləcəkləri bir “MÜXALİFƏT” formalaşdırmaq lazım gəlir.
İqtidar
tərəfindən yaradılan bu tip müxalif qüvvələrə (partiyalara) elmi-siyasi ədəbiyyatlarda
“Cib müxalifəti”, “Sistem müxalifəti” və s. də deyirlər. Fikrimizcə, MÜXALİFƏT
məfhumunun mahiyyətini ehtiva etmədiyinə görə, belə siyasi qüvvələri İQTİDAR
OYUNCAĞI adlandırmaq daha məqbuldur.
Beləliklə,
İQTİDAR tərəfindən aşkar və qeyr-aşkar üsullarla legitimlik verilərək beynəlxalq
aləmə və daxili auditoriyaya müxalifət kimi sırınmağa çalışılan faktiki heç bir
təsir mexanizmi olmayan yalnız müxalifət imitasiyası yaradan siyasi qruplara
İQTİDAR OYUNCAĞI deyirik. Birinci aşkar üsullarla yaradılan İQTİDAR OYUNCAĞI
aydın şəkildə nümayişkəranə bir tərzdə həyata keçirilir ki, cəmiyyət və beynəlxalq
aləm müxalifətin İQTİDARI dəstəkləməsini görsün. Yəni bu zaman cəmiyyət fərqində
ola bilir ki, “müxalifət” adlandırılan həmin siyasi qruplar (partiyalar, liderciklər
və s.) əslində iqtidarın oyuncağıdır. İkinci qeyri-aşkar üsullarla isə mövcud
olan və bir zamanlar özündə həqiqətən müxalif məzmunu daşıyan siyasi qüvvələr
incə bir şəkildə, hiyləgər strateji və taktiki gedişlərlə oyuncağa çevirilir.
Bu ikinci gedişi çox vaxt cəmiyyət qavraya bilmir, bəzən hətta həmin qüvvlərin
lidercikləri belə özləri oyuncağa çevrilirlər və heç bundan xəbərləri belə
olmur. Cəmiyyət üçün ən təhlükəlisi elə budur. Çünki cəmiyyət həqiqətən bu zaman
çaş-baş qalır.
Təbii ki, belə hiyləgər siyasi gedişlər elə incə
bir şəkildə edilməlidir ki, cəmiyyət bu süniliyin fərqində ola bilməsin. Əgər cəmiyyət
süniliyin fərqinə vara bilsə, hər şey nəzarətdən çıxa bilir. İQTİDARın,
xüsusuilə, cəmiyyətdə özünə xalqın müəyyən bir kəsimi tərəfindən də
olsa sosial baza toplamış MÜXALİF qüvvələrini oyuncağa çevirməyi olduqca hiyləgərliklə
həyata keçirilir. Buna görə də cəmiyyətin əksər hissəsi (hətta çox zaman siyasi
aktiv hissə belə) bunu hiss edə bilmir, anlaya bilmir və iqtidarın siyasi tələsinə
düşərək elə başa düşürlər ki, ölkədə bir real müxalif qüvvə (lider) varsa, elə
onların bildikləri qruplardır (partiyalardır, liderciklərdir və s. hansı ki,
tez-tez “təzyiqlərə” məruz qalırlar və s.). Əslində isə həmin müxalif qrupun
(liderin və s.) iqtidar tərəfindən bir oyuncağa çevrildiyini görə bilmirlər və
iqtidarın oyununa gəlmiş olurlar. Bu, necə həyata keçirilir? Sadə şəkildə izah
etməyə çalışaq.
Misal: Tutaq ki, 10000 əhalisi olan Nargin adasında
bir dövlət var və onun iqtdarının başında Mən dayanıram. Təbii ki, ən əsas məqsədim
hakimiyyətimi bütün üsullarla uzun müddətə əldə saxlamaqdır. Bunun üçün əlimdə
hər cür imkanlarım var və bundan maksimum istifadə edəcəyəm.
Birinci
işim, ilk növbədə sözün əsl mənasında yuxarıda qeyd etdiyim 3 amili özündə cəmləşdirə
biləcək əsl MÜXALİFƏTin yaranmasının qarşısını almaqdır. Lakin mənə həmçinin, həm
beynəlxalq aləmdə, həm də ölkə daxilində legitimliyim üçün (görüntü üçün) “müxalifətin”
olması vacibdir. Buna görə, özümün nəzarət edə biləcəyim, bu və ya digər
formada idarəsini yönləndirə biləcəyim,
“müxalifət” (müxalif partiyalar, liderciklər və s.) yaradıram. Bu
prosesi əsasən iki istiqamədə həyata keçirməyim lazımdır. 1. Əksəriyyətə əsl
kimliyi məlum olan “müxalif” qüvvələri - məni tərənnüm edən partiyaları,
lidercikləri formalaşdırıram, onları müxtəlif vasitələrlə əlimdə saxlayıram və
aləmə müxalifət kimi sırıyıram. Onların əsl kimliyini xalqın özü də aşkar şəkildə
görə bilir.
İkinci halda isə, ustalıqla nə vaxtsa tarixin
hansısa boşluğunda bir fürsət tapıb yaranmış müxalif siyasi qüvvələri (partiya
və xüsusilə, onun zəkadan məhrum funksionerlərini) oyuncağa çevirirəm (çox vaxt
nəinki cəmiyyət, hətta həmin siyasi qrupların “lidercikləri” də bunu anlaya
bilmirlər).
Əvvəlcə,
müəyyən edirəm ki, bu siyasi qrup mənim hakimiyyətim üçün nə dərəcədə təhlükəlidir.
Əgər yuxarıda mən sadaladığım prinsiplər həmin siyasi qrupda (partiyada) varsa (yəni ideoogiya, sosial bazası, aydın hədəf
), həqiqətən bu, ciddi bir təhlükədir, mütləq onu məhv etməliyəm. Yox əgər
yoxdursa və əminəm ki, həmin siyasi qrupun səriştəsiz funksionerləri 100 il də
çalışsalar cılız ağıl və dərrakəylə mənim hakimiyyətimi əlimdən ala bilməzlər. Bu
zaman onları qətiyyən məhv etməyib, əksinə hakimiyyətimin ömrünü uzatmaları
üçün onlara özüm legitimik verirəm ki, əbədi “müxalifət” olsunlar. Çünki onların
əlindən onsuz da bir iş gələn deyil.
Bir
az da fikrimi sadə formada izah etməyə çalışım.
Tutaq
ki, belə bir partiya var “Deyingənlər” partiyası, sədri də Şahqulu adlı bir
özündən müştəbehdir. Baxıb görürəm ki, bu partiyada ən küt adam elə onun sədrdir.
Əlbəttə, bu Şahqulu siyasi prosesləri dərk edə biləcək bir zehniyyətdə deyil.
Eyni üsulları təkrarlamaqla mənə qalib gəlməyə çalışan bir fərsizdir. Lakin Şahqulunun
hədsiz eqoizmi var və siyasi səbatı olmadığından özü də bilmədən mənim
oyuncağıma çevrilir. Bu ağıl və dərrakə
ilə 100 il də qalsa mənim hakimiyyətimə xətər yetirə bilməz. Əksinə özü də bilmədən mənə son dərəcə faydalı
olur. Kifayətdir ki, onun vasitəsi ilə partiyasını, eləcə də bütövlükdə bir cəmiyyəti
incə bir şəkildə manupulyasiya edə bilirəm.
Bəs
bunu necə edirəm, çalışıb detallı aydınlaşdırım.
Bəsit
qaydalar var. 1. Şahqulunu daim gündəmdə
saxlamaq lazımdır və əhalinin də gözünə bunun ən təhlükəli və əsl müxalifət
olduğunu, mənim isə ondan qorxub-çəkindiyimi bir şəkildə incə formada nümayiş
etdirirəm. Məsələn, göstəriş verirəm güc strukturlarına Şahqulunun ətrafında
olanlardan həbs etsinlər. Müavini Fatmanisəni keyfim istəyən maddə ilə həbsə
saldırıram. Fatmanisənin həbsi ilə artıq
müxalif media xəbərin üstünə düşür. Bu zaman hamı gəlir partiya sədrinin yanına
ki, bəs, Şahqulu, bu nə deməkdir? Şahqulu da dərk etmədən başlayır ki, bəs hakimiyyət mənə təzyiq etmək üçün
(sehrli cümlə budur) mənim müavinimi həbs edib (halbuki, istəsəm bu Şahqulunun
başını qarpız kimi partlatdıra bilərəm və üstündən də su içərəm gedər). Bu
kütbeyin mənim hiyləgər gedişimi anlamır ki, əslində mən bu Şahqulunu gündəmdə
saxlamaq üçün onun müavinini həbs etdirmişəm (yeri gəlmişkən, bu səbatsız əgər
bunu dilinə gətirsə, mənim belə strateji gedişim alt-üst ola bilər, ancaq onda
o baş hardadır?!). Onun özü kimi fanatikləri də bu fikirləri tirajlayırlar. Beləliklə
də, cəmiyyətin də əksər hissəsində belə bir fikir formalaşır ki, məmləktdə
var-yox bir müxalifət varsa, o da Şahqulu və onun Deyingənlər Partiyasıdır. Beləliklə
də mən öz istəyimə çatıram. Belə ki, kütbeyin Şahqulu özünün bu cür axmaq
davranışları ilə əslində yeni liderlərin və həmçinin sağlam müxalif düşərgənin
meydana gəlməsinin qarşısını alır. Buna görə də onu “müxalif lider” kimi daim
gündəmdə saxlamalıyam. Əgər meydandan onu çıxarsam həqiqi mənada müxalif liderlərin
yetişməsi üçün münbit şərait yaranmış olar. Elə “ilanı Əhmədin əli ilə tuturam”
da.
2. Məqalənin ikinci sualına keçək. Görək, BİRGƏ RAZILAŞMAya görə
MÜXALİFƏT necə olmalıdır?
Qeyd
etməliyik ki, BİRGƏ RAZILAŞMA KONSEPSİYASI onun əsas, fundamental tezisləri ilə
ziddiyyət təşkil etməyən bütün qrupların, birliklərin fəaliyyətini təqdir edir.
Konsepsiyamıza
görə, ilk olaraq, MÜXALİFƏT yuxarıda sadaladığım 3 amili özündə ehtiva etməlidir.
Birinci
amilə görə, MÜXALİFƏT müfəssəl, aydın bir ideologiyaya sahib olmalıdır. Fərqli
tarixi dönəmlərdə bu və ya digər məfhumlara, xüsusilə də dövlət, hakimiyyət məsələlərinə münasibətdə müxtəlif,
çoxtərəfli ideoloji yanaşmalar (məsələn: quldarlıq, feodal, kapitalist,
komunist, sosialist, liberalist və s.) mövcud olmuşdur. İdeoloji müxtəliflikdən
asılı olmayaraq, MÜXALİFƏTin istənilən
bir (özünəməxsus) ideologiyasının olması onun müəyyənləşmiş kimliyini
aydınlaşdıran ən başlıca amilə çevrilir. Bəlli bir ideologiyasının olması ilə MÜXALİFƏT
ilk nöbvədə özü üçün aydınlaşdırmış olur ki, o nə istəyir?! Nə istədiyini aydın
bir şəkildə anlayan MÜXALİFƏT daha sonra cəmiyyətə də bu istəyini izah etməyi
bacarır.
Beləliklə,
ikinci amil - MÜXALİFƏT öz ideologiyası ətrafında sosial baza formalaşdırmağı və
ideologiyaya əsaslanan ALTERNATİV SİSTEM kimi meydana çıxmağı bacarmalıdır
tezisi zəruriləşir.
Nə
istədyini aydın şəkildə bilən MÜXALİFƏT öz ideologiyasına inandırmağı bacarması
müqabilində cəmiyyətin bu ideyaları qəbul edib, dəstək verərək ətrafında birləşməsini
təmin etmiş olur.
Ortalığa
qoyduğuğu sağlam ideologiyaya inanaraq dəstək çıxanların sayı artıqca əslində
MÜXALİFƏT tədricən legitimlik qazanmış olur. Bu legitimliyi isə MÜXALİFƏTə məhz
xalq özü vermiş olur. Xalq tərəfindən legitimlik əldə etməyi bacarmış MÜXALİFƏTin
artıq zərurətdən doğan ALTERNATİV SİSTEM formasında təzahür etməsi labüdləşir.
Və
nəhayət üçüncü amil - MÜXALİFƏT dəqiq müəyyən edilmiş hədəfə və ona çatmaq üçün
yetərli strategiyaya, taktiki gedişlərə malik olmalıdır ki, müəyyən edilmiş
ideologiyasını gerçəkləşdirə bilsin.
Yəni
MÜXALİFƏT tərəfindən əvvəlcədən özünün təsbitlədiyi ideolji bazası əsasında cəmiyyətdə
yaşam tərzini formalaşdırmaq üçün aydın hədəfi müəyyənləşməlidir. Bu hədəfə çatmaq üçün isə resursları
qorumaq şərtilə maksimum təhlükəsiz, sistemli strategiya müəyyən edilməli və
taktiki gedişlər saat dəqiqliyi ilə addım-addım həyata keçirilməlidir.
Ramin
Allahverdi
Comments
Post a Comment