4. BİRGƏ RAZILAŞMA və QANUNLAR
4. BİRGƏ
RAZILAŞMA və QANUNLAR
BİRGƏ RAZILAŞMA Mən, Sən və Onun (yəni cəmiyyətin bütün üzvləri) tərəfindən
yekdilliklə qəbul edilən ən ali RAZILAŞMAdır və buna görə də birbaşa hüquqi
qüvvəyə malikdir. Qurduğumuz Birgəyaşamın (cəmiyyətin)
ayrı-ayrı fərdlərinin bir-biri ilə bütün münasibətlərini tənzimləyən qaydalara
(normativlərə) ehtiyac yarandığına görə müvafiq sahələr üzrə qaydalar
sisteminin (normativ hüquqi aktların) qəbul edilməsi zərurəti meydana çıxır. Həmin
qaydalar sisteminə (normativ-hüquqi aktlara) Qanun deyirik. Qanun elə bir ali
normativdir ki, qəbul edilib qüvvəyə mindikdən sonra hər kəsin ona tabe olub
riayət etməsi məcburi xarakter alır. Qanunlar qəbul edilərkən Ali Qanun
statusunda olan BİRGƏ RAZILAŞMAnın bütün müddəaları əsasında,
onlara zidd olmayaraq qəbul olunmalıdır.
Beləliklə, hər birimizin yekdilliklə iştirakı ilə qəbul
edilmiş BİRGƏ RAZILAŞMA Ali Qanundur və bütün digər qanunlar, yəni
qanunvericilik bazası məhz onun əsas tezisləri üzərində formalaşmalıdır. BİRGƏ
RAZILAŞMAnın aliliyi Mən, Sən və Onun, yəni cəmiyyətin üzvləri tərəfindən birmənalı
qəbul olunmalı və bütün müddəalara mütləq qaydada əməl edilməlidir. BİRGƏ
RAZILAŞMAnı şüurlu surətdə qəbul edən hər bir şəxs onun müddəalarına, tələblərinə
ilk növbədə özü əməl etməlidir. Əgər kimsə bilməyərəkdən və yaxud bilərəkdən
BİRGƏ RAZILAŞMAnın hamılıqla qəbul edilmiş müddəalarını (eləcə də onun əsasında
hazırlanmış qanunları) pozarsa, buna görə mütləq cavab verməli (məsuliyyətə cəlb
olunmalı) və ədalətli şəkildə cəzalandırılmalıdır.
Tutaq
ki, bizim hamımız üçün nəzərdə tutulan istirahət parkında oturmaqdan ötrü bir skameyka
var. Lakin sıramızdan bir nəfər onu sındırır, yaxud oğurlayır. Bununla da o,
bizim (Mənim, Sənin və Onun) həmin əşyanın üzərində olan haqlarımızı tapdalayır. Onun bu hərəkəti bizi bir araya gətirən,
bizim haqlarımızı qoruyan BİRGƏ RAZILAŞMAYA qəsd olduğu üçün cəzalandırılması
labüddür. Bu mənada BİRGƏ RAZILAŞMA Mənim, Sənin, Onun, yəni bizim hüquq və
azadlıqlarımızın ən əvəzolunmaz müdafiəçisidir. Yetər ki, bunun fəlsəfəsini
anlayıb şüurlu şəkildə tələblərinə əməl edək (onsuz da əks halda məcburi riayətetmə
qaçılmazdır).
Sadə
bir misal çəkək. Məsələn, hamılıqla belə bir qaydanı qəbul etmişik ki, piyada olaraq
yolu ancaq işıqforun yaşıl işığı piyadalar üçün yananda keçməliyik. Qırmızı
işıq yananda isə yolu keçmək qadağandır, yəni mütləq dayanıb gözləməliyik
(maşın gəlmir və ya yol polisi yoxdur deyə keçməli deyilik). Beləliklə, biz bu
qaydanı şüurlu şəkildə qəbul etdik və deməli, mütləq əməl etməliyik. Amma çox
zaman bu qaydanı cəmiyyətin üzvləri pozurlar. Yəni burada seçim ixtiyarı bizim əlimizdə
olanda bəzilərimiz həmin qaydanı pozaraq yolu qırmızı işıqda keçirik (maşın gəlmir,
yol polisi yoxdur düşünərək).
Əslində
isə həmin vəziyyətdə hər şey yalnız Mən, Sən və Ondan, yəni bizdən (cəmiyyətin
üzvlərindən) asılıdır, seçim azadlığımız var (yəni istəsək qırmızıda, istəsək də
gözləyib yaşıl işıq yanada keçə bilərik), biz qanunun tələbinə tam əməl edərək
işıqforun qırmızı işığının sönməsini və yaşılın yanmasını gözləməyə borcluyuq.
Çünki hamılıqla qəbul etdiyimiz qayda bunu tələb edir. Təəssüf ki, bizim cəmiyyətdə
hazırda qanunlara biganə, hətta aşağılayıcı münasibət var. “Qanunlar pozulmaq
üçündür” deyimi də məhz bu münasibətin (düşüncənin) linqivistik təzahürüdür. Belə
düşüncə modeli isə tamamilə zərərlidir və əslində bizim hər birimizi hədəfləyir.
Bu düşüncə tərzi bizim sıralarımızdan çıxan hansısa
hakimin ondan tamamilə asılı olan qərarı verərkən qanunazidd qətnaməni çıxarması
ilə təfəkkür modeli kimi, demək olar ki, eynidir. Başqa cür desək, seçim
azadlığı olan bəzilərimizin yolu qırmızı işıqda keçmək qadağandır qaydasını
pozması ilə bir hakimin seçim azadlığı olsa da ədalətsiz qərar çıxarması zeyniyyətcə
eynilik təşkil edir.
Qəbul
etməliyik ki, BİRGƏ RAZILAŞMAya əsaslanan qanun qarşısında hamı bərabərdir və
hamı eyni məsuliyyəti daşıyır. Əgər Mən, Sən, O, yəni biz qanunu pozuruqsa, ən
azı elə özümümüz öz haqlarımızı tapdaladığımıza görə mütləq cəzalanmalıyıq.
BİRGƏ
RAZILAŞMAnın tərəfdarı olan Mən, Sən, O, yəni biz :
1.
İlk
növbədə qəbul edilmiş qaydaya tabe olmalıyıq;
2.
Əgər
qaydanı bilərəkdən və ya bilməyərəkdən pozmuşuqsa, mütləq cəzalandırılmalıyıq;
3.
Cəmiyyətin
digər üzvləri qanununu pozanın cəzalandırmasını tələb edib buna nail
olmalıdırlar.
Beləliklə,
ali olan BİRGƏ RAZILAŞMAnı qəbul etmişəmsə, onun qaydalarını pozduğum halda, özüm
cəzalandırılmalı, atam, anam, qardaşım, bacım, dayoğlu, bacıoğlu, biboğlu,
xaloğlu, nənə, baba, qonşum, tanış-biliş, dost, qohum-əqraba və s. pozublarsa, onlar
cəzalandırılmalı, mən özüm də tələb edərək buna nail olmalıyam. “Əzizim əzizdir,
tərbiyəsi ondan da əzidir” prinsipi üzrə hərəkət edilməlidir. Qədim Romada
olduğu kimi, “Qoy Roma məhv olsun, təki qanun yaşasın”.
Comments
Post a Comment