3 RASİONAL BİRGƏ RAZILAŞMA VƏ AĞSAQQALLIQ İNSTİTUTU
RASİONAL
BİRGƏ RAZILAŞMA VƏ AĞSAQQALLIQ İNSTİTUTU
Artıq
qeyd etdiyim kimi, BİRGƏ RAZILAŞMA Mən, Sən və Onun, yəni cəmiyyət üzvlərinin
qarşılıqlı anlaşma şəraitində öz azadlıqlarının müəyyən bir hissəsini daha
faydalı olan Birgə yaşayış (cəmiyyət olaraq)
naminə məhdudlaşdırılmasına könüllü olaraq razılaşmasıdır. Təbii ki, cəmiyyətin
ilkin mərhələlərində bu birgəyaşayışlar (birliklər) əsas etibarilə kortəbii
xarakter daşıyırdı və müxtəlif rituallar, mərasimlər, ayinlər, adət-ənənələr və
s. ilə təmsil olunurdu.
Bu
günün özündə də Qanun (Birgə razılaşma), yəni rasional olan razılaşmalar
işləmədiyi yerlərdə cəmiyyət, təəssüflər ki, həmin adət-ənənələrə, ayinlərə və s. əsasən, yəni kortəbii Birgə razılaşmalara
uğun olaraq yaşayır.
Belə
kortəbii qaydalar sistemindən ibarət adət-ənənələrdən biri də Ağsaqqallıqla
bağlıdır. Bəs görək bu ağsaqqallıq nə deməkdir? Ağsaqqallıq necə instituta çevrilmişdir?
Məlum
olduğu kimi, hələ ilk insan cəmiyyəti formalaşarkən Ağsaqqallar Şurası
yaranmağa başlamışdır. Həmin cəmiyyətdə Ağsaqqallar hegemon qüvvəyə malik
olduğundan idarəçiliyi özləri istədikləri kimi, təbii ki, öz mənafelərinə uyğun
olaraq həyata keçirirdilər, cəmiyyətin digər üzvləri onlara tabe olmalı əks halda
cəzalanmalı idilər. Yəni Ağsaqqallar həm qanun, həm dövlət funksiyasını yerinə yetirirdilər.
Beləliklə, ağsaqqala hörmət etməyin tarixi
kökləri minilliklərə dayanır. Bu institut o qədər dərindən bizim
davranışlarımıza və həyatımıza sirayət edib ki, bu gün belə onun şüuraltı təsiri ilə hərəkət etməli
oluruq.
Bəs
Azərbaycanlı mentalitetində bu gün Ağsaqqallıq nədir? Bu anlayış
institutlaşıbmı?
Ağsaqqal
sözü iki anlamı ehtiva edir. Birinci mənası böyük, yaşlı, qoca kimi anlaşılır.
İkincisi, yəni məcazi məzmunu da təxminən həmin mənayla səsləşərək böyüklük,
rəhbərlik, ağalıq və s. kimi anlamları
bildirir.
Ağsaqqallıq
institutunu
səciyyələndirən başlıca cəhət “böyük-kiçik” məsələsidir. Bu prinsipə görə yaşca böyük olan
daim yuxarı statusa malik olur, kiçik isə aşağı statusda qalır. Əslində isə insanın yaş fərqini
önə çəkən bu prinsip cəmiyyət üzvləri arasında qeyri-bərabərlik yaradır və
insanlar arasında anadangəlmə bərabərlik prinsipini pozaraq arxa plana atır. Bu
cəhətə görə yaşca kiçik (cavan) olan biri böyük (qoca) olana daimi güzəştə getməyə
borcludur. Yəni yaşı çox olan biri sanki xüsusi bir status əldə
etmiş olur. Təsəvvür edin ki, yaşca böyük olan axmaqdır və ağılsız qərarlar verir,
kiçik olanlar isə “böyük-kiçik” prinsipinə görə mexaniki onun qərarlarını
yerinə yetirir. Bu vəziyyət bütövlükdə cəmiyyəti axmaq bir duruma gətirib çıxarmazmı?!
Ağsaqqallıq institutun əsas tezisi olan “böyük-kiçik”
prinsipi bir çox atalar sözləri, deyimlər ilə də təsbitlənir. Məsələn, “Böyük danışanda kiçik danışmaz”, “Allahsız yerdə otur,
böyüksüz yerdə oturma”, “Böyük nə dedi qanundur”, “Böyük gələndə ayağa
qalxarlar”, “Böyüyün tanımayan qibləsin də tanımaz”, “Böyüyün üzünə ağ olanı torpaq götürməz”, “Böyüyünü ayaqlayan Allahını ayaqlayar”, “Ağa deyir,
sür dərəyə, sür dərəyə” və s.
Yəni bir
sözlə böyüklər öz mənafelərinə uyğun bütün tədbirləri görüblər. Beləliklə, ağsaqqallıq ilk növbədə böyüklük, hökmranlıq,
sözü ötkəmlik, səlahiyyətli olmaq və s.
deməkdir. Yəni biri əgər yaşına görə böyükdürsə, ona avtomatik olaraq qeyd
etdiyimiz imtiyazlar aid olur.
Göründyü kimi, bu institut müasir anlamda ona gətirib
çıxardır ki, ağsaqqal adam, yəni yaşca böyük olan adam hər şeydə haqlıdır, onun
sözünə qulaq asmaq lazımdır. Ona qulaq asmasan ziyan taparsan, o, nə desə o
olmalıdır, onun dedikləri qanundur və s. Amma sorğulama yoxdur ki, bu ağsaqqalın
dediyi fikir hansı əsaslarla düzgündür ki, onu qəbul etmək lazımdır. Guya ki,
ağsaqqal olan nöqsansız olandır. Halbuki cəmiyyəti bəlalara sürükləyənlərin
içində ağsaqqallar mənfi mənada müstəsna rola malikdirlər.
Beləliklə, “ağsaqqal dedisə, deməli, əməl olunmalıdır”
yanaşması insanlarda açıq-aşkar kölə düşüncəsi formalaşdırır və bu, əsla qəbul
edilə bilməz. Əslində bizim ağsaqqal adlandırdıqlarımız sıradan bir insandır,
onlar kiçik olanlarla bərabərdirlər,
əqli, məntiqi və s. cəhətdən qətiyyən digərlərindən üstün deyillər. Yəni yaşca böyük olmaq üstünlük üçün arqument ola
bilməz. Bu mənada Ağsaqqallıq institutu kifayət qədər ciddi sui-istifadə
hallarına gətirib çıxarır.
Ağsaqqal deyəndə, əlbəttə, ilk növbədə babalarımız,
nənələrimiz, valdeynlərimiz, əmilərimiz, bibilərimiz, dayılarımız, xalalarımız
və b. nəzərdə tutulur. Ağsaqqallıq
institutunun tələbinə görə kiçiklər ağsaqqalların, böyüklərin sözünə kor-korənə
sorğulamadan, şəksiz qulaq asıb əməl etməlidirlər.
Ona görə də, onlar bizim əvəzimizdən şəstlə çəkinmədən
qərarlar verirlər. Halbuki, ağsaqqalların (böyüklərin) səhv etmə riski,
kiçiklərdən (oğul, qız, bacıoğlu, bacıqızı və s.) heç də az deyil və bir çox
hallarda hətta onlardan daha bərbad qərarlar qəbul edirlər. Bu da çox vaxt
ağsaqqalların düşüncə tərzinin daha müasir proseslərə adaptasiya ola bilməməsi,
reallığı öz köhnə bilgilirəi ilə hesablamaları ilə bağlı olur (əlbəttə, bu heç
də o demək deyil ki, onlar bizi bilərəkdən, bizi istəmədiklərinə görə yalnış
yola çəkir. Xeyr, əksər vaxtı onların düzgün
bildiklrəri, inandıqları nəsnələr özü yalnış olduğu üçün əslində doğru olmayan
qərarlar verirlər). Ən gülməli məqam odur ki, böyükləri verdikləri qərarlara
görə sorğulayanda “mən böyüyəm, sən kiçiksən,
deməli, dediyimi etməlisən” “arqumentini” ortalığa atırlar. İrrasionalığa
əsaslanan bu instituta bizim hisslərimiz
(valdeylərimzə, əmi-dayılarımıza, xala-bibilərimizə və s. olan məhəbbət,
hörmət, minnətdarlıq və s. duyğuları) də kifayət qədər dəstək verir.
Sevindirici haldır ki, bu institutun effektsiz
olduğunu görən müdriklərimiz buna alternativ olaraq belə bir atalar sözü də
işlədirlər ki, “Ağıl yaşda deyil, başda olar”. Məhz bu deyimi Ağsaqqallıq
institutuna alternativ bir model olan Rasional Birgə Razılaşmanın prinsiplərini
dəstəkləyən tezislərdən biri kimi götürə bilərik.
Rasional yanaşma Birgə Razılaşmanın insanların
bərabərliyi, anadangəlmə azadlığı, düşüncə azadlığı kimi tezislərini meydana
qoyur. Yəni hər kəs böyük-kiçik olmasından asılı olmayaraq özü bütün məsələlərə
raisonal yanaşaraq öz qərarını qəbul etmək hüququna malikdir. Böyüklərin
böyüklük kimi xüsusi statusu aradan qalxmalı, bərabərlik prinsipi ilə
əvəzlənməlidir (əlbəttə, burada fizioloji baxımdan yaşlılara, qocalar tətbiq
olunan yer vermək, köməklik göstərmək və s. kimi hallar rasional yanaşmaya görə
tamamilə qəbul olunandır).
Yəni bizə böyüklər tərəfindən edilən tövsiyələrin,
məsləhətlərin heç birini kor-koranə yerinə
yetirməyəcək, skeptik yanaşıb sorğulayacağıq. Filosof Rene Dekartın təbirincə
desək, “Əgər həqiqəti həqiqətən bilmək istəyirsənsə, həyatında bircə dəfə olsun
hər şeyə şübhə et”.
Deməli, hər bir məsələdə özümüz
düşünüb qərar verəcəyik. Beləliklə də istənilən məsələyə rasional yanaşacağıq. Babaların,
nənələrin, ataların, anaların, əmilərin, dayıların, xalaların, bibilərin və
digər böyüklərin dediklərini sorğulayıb təhlil etdikdən və doğru olduğuna
inanadıqdan sonra qərar verəcəyik. Əlbəttə, öz analitik qərarımızı. Rasional
qərarımızı.
Ramin Allahverdi
Comments
Post a Comment