2. BİRGƏ RAZILAŞMA - MƏN, SƏN VƏ O
Ramin Allahverdi
Mən tək, yoxsa Sən və Onunla birgə yaşamalıyam?!
Vacib
məsələlərdən biri budur ki, Mən fərd olaraq təkbaşına yaşamalıyam, yoxsa Sən və
Onunla birgə (yəni cəmiyyət olaraq) yaşamalıyıq?!
Əvvəlcə
ona aydınlıq gətirməliyəm ki, Mən niyə tək yaşamalıyam? Bunun üstün və
çatışmayan cəhəti nədir? Ən ümdə üstünlüyü odur ki, hər şeydən öncə tək
yaşadıqda tam azad oluram. Azad olmaq isə mənim təbii anadangəlmə haqqımdır. Hər
kəs anadan olandan azad olmaq hüqququna malikdir. Belə olan halda mənim hər şeyə
haqqım çatır.
Lakin
mən tək yaşayanda itirəcəyim şeylər birgə yaşayarkən itirəcəyim şeylərdən
qat-qat daha çoxdur. Bunu hələ tarix elmi sübut edir ki, ən qədim insanlar
şüurlu surətdə deyil, fövqəladə vəziyyətlərdən qorunmaq, təbiət hadisələri
qarşısında aciz qalmamaq, heyvanlardan mühafizə olunmaq, qidanı birgə əldə etmək və s.üçün kiçik
qruplarda birləşirdilər.
Deməli,
birgə yaşamağın faydalarını hələ ibtidai insanlar kəşf etmişdilər. İndiki
zamanda isə insanlara birgə yaşamağın nə qədər vacibliyini izah etməyə ehtiyac
yoxdur.
Beləliklə,
Mən, Sən, O başa düşdük ki, birgə yaşamaq, təkbaşına yaşamaqdan daha
faydalıdır. Lakin birgə (cəmiyyət olaraq) yaşamaq üçün biz, yəni Mən, Sən və O
öz şəxsi (fərdi) azadlığımızın bir hissəsinin
məhdudlaşdırlmasına könüllü olaraq razı olmalıyıq.
Mən
hazırkı yazıda “Mən, Sən və O” ifadəsini “cəmiyyət” sözünün əvəzinə işlədirəm.
Çünki cəmiyyət deyəndə əksəriyyət elə bilir ki, fərd olaraq onun da daxil
olduğu birlikdən söhbət getmir, hansısa kənarda bir nəsnə barəsində danışırıq
Beləliklə,
Mən, Sən və O, BİRGƏ RAZILAŞMA əsasında maraqlarımızı təmin edən birlik və ya cəmiyyət
yaradırıq. Üzü qədimdən, yəni elə ilk
insan birlikləri yaranandan bəri institutlaşmış yazılmamış qaydalar, adət-ənənələr,
tabular, mərasimlər, rituallar, dini ayinlər və s. əslində bu kortəbii BİRGƏ
RAZILAŞMAdır və cəmiyyətdəki münasibətləri pis-yaxşı nizamda saxlamışdır (növbəti
yazılardan birində bu barədə ətraflı yazarıq).
Beləcə,
rasional olaraq birgə yaşayışın üstünlüklərinin tək yaşamaqdan qat-qat artıq
olduğunu dərk edən Mən, Sən və O qərara gəlirik ki, birgə yaşamaq, yəni cəmiyyət
olmaq, cəmiyyət kimi yaşamaq kifayət qədər əhəmiyyətli olduğuna görə özümüzə
aid olan azadlıqlarımızın müəyyən bir hissəsini məhdudlaşdırmağı məqsədəuyğun
sayırıq və cəmiyyəti qururuq. Birlik yaratdıqda, yəni cəmiyyət olduqda təbii
ki, hər birimizin maraqları da vardır ki, bu maraqlar bizi toqquşmalara gətirməsin
deyə BİRGƏ RAZILIĞA gəlirik.
BİRGƏ
RAZILAŞMAnın əsas müddəalarını, tezislərini aşağıdakı kimi qəbul edirik:
1.
Mən,
Sən və O (yəni insan) ən ali varlıqıq.
2.
Mənim
(hər bir insan, fərdin) azadlığım (müstəqilliyim) ən ali dəyərdir. Mənim
azadlığım məni xoşbəxt edə biləcək başlıca alınmaz dəyərimdir.
3.
Mən
(hər bir insan, fərd) doğulduğum andan etibarən azad yaşamaq, azad olmaq, xoşbəxt
olmağa can atmaq kimi alınmaz ali haqlara malikəm. Mənim (insanın) azadlığımı
(haqlarımı) heç kəs və heç nə məhdudlaşdıra bilməz.
4.
Mənim
azadlığım yalnız və yalınız Sənin və Onun hüquqları, haqları başlayan yerdə
bitir.
5.
Mən,
Sən və Onun birliyi suverendır (müstəsna səlahiyyətlidir). Suveren müstəsna səlahiyyətləri
olmaq deməkdir. Bu suverenlik, müstəsna səlahiyyət bizə yuxardakı müddəaları nəzərə
alaraq istədiyimiz kimi fəaliyyət göstərməyimizin zəminidir. Həmin müstəsna səlahiyyətimizin
az və ya çox hissəsini hansısa bir hüquqi şəxs (məs.: dövlət) yaradıb ona verə
bilərik.
6.
Qəbul
etdiyimiz bu BİRGƏ RAZILAŞMAnın bütün müddəaları alidir və Mən, Sən, O, yəni hər
birimiz şəksiz əməl etməliyik. Əməl etməyənlər cəzalandırılmalıdır.
7.
BİRGƏ
RAZILAŞMAya əməl edilməsinə hamı nəzarət edir. Bu razılaşma yalnız və yalnız Mənim,
Sənin və Onun (hər bir nəfərin) razılığı ilə dəyişdirilə bilər.
Comments
Post a Comment