FEMİNİZM BİRGƏ RAZILAŞMA KONSEPSİYASI İŞIĞINDA
Firuzə Qaloyeva
FEMİNİZM
BİRGƏ RAZILAŞMA KONSEPSİYASI İŞIĞINDA
Açar sözlər: feminizm,
insan kimliyi, cəmiyyət, hüquqlar
Dünyada yaşayan bütün insanlar müxtəlif kimliklərə (dini, regional,
irsi və.s) görə bir – birindən fərqlənirlər. Yalnız bir kimlik mütləqlik tələb
edir: İnsan kimliyi. Əgər bir insan xeyirxahdırsa, içində mərhəmət, əliaçıqlıq,
yaxşılıq, dürüstlük, vicdan, ədalət kimi insani duyğular daşıyırsa, digər kimlikləri o qədər də əhəmiyyət kəsb
etmir. Bununla bağlı bir nümunə qeyd etmək istəyirəm. Bir filmdə qadın uşaqdan
bunu soruşur:” Səncə, mələklərmi insandan
üstündür, yoxsa insanlarmı?” Uşaq, əlbəttə ki, mələkləri seçir. Lakin
qadın bu cür cavab verir: ”Mələklər yaxşılıq etməyə məhkumdurlar. Yəni bu
onların seçimi deyil. Ancaq Tanrı bizə seçim azadlığı verir. Yaxşı və pis
olmağı biz özümüz seçirik. Əgər sən yaxşı olmağı seçirsənsə, deməli, sən mələklərdən
də üstünsən”. Beləcə, uşaq yaxşılığı,
insanlığı seçməyin ucalığını dərk edir (https://youtu.be/Qgnudbleh30
linkinə daxil olaraq filmdən seçilmiş hissəni izləyə
bilərsiniz). Birgə Razılaşma Konsepsiyası da məhz bu fikri dəstəkləyir.
Birgə Razılaşma cəmiyyətində yaşamağı istəyən insanlara ilk olaraq bu seçim azadlığı verilir. Hər
birimiz: Mən, Sən və O, azad və xoşbəxt olmaq istəyirik. Bu bizim ortaq
arzumuzdur. Arzu olmaqla bərabər bizim haqqımızdır. Buna baxmayaraq azadlıq bizə
bir seçim kimi verilirsə, bu demək deyil ki, biz başqalarının hüquqlarını
tapdalamalı, öz xoşbəxtliyimizi hər şeydən yuxarıda tutmalı, sözün əsl mənasında
ağlımıza gələni etməliyik. Nəzərə almalıyıq ki, təkcə insanlar deyil,
milyonlarla digər canlıların da olduğu bir dünyada yaşayırıq. Və hamımız eyni,
bərabər hüquqlara sahibik. Bəs cəmiyyətdə azad, xoşbəxt həyatı necə qura bilərik? Ədalətin köməyi ilə. İstənilən kollektivdə (
işdə, ailədə, cəmiyyətdə və s.) ədalətli olmaq həm insan olaraq bizə hörmət
qazandırır, həm də başqalarının hüququnu qorumaq, vicdani olaraq doğru olanı
etmək birgə yaşadığımız cəmiyyətdəki insanların gələcəyə olan ümidini artırır.
Bəs birgə yaşamaq bu qədər asan olduğu təqdirdə nə üçün cəmiyyət “yazılmamış və
doğru olmayan qanunlara” əməl edir? Əvvəla, bunun bir neçə səbəbi olsa da, əsas
səbəb insanların şüurlu düşünməyi bilməməsidir. İkincisi isə, “filankəs də bunu etdi, mən niyə etməyim?”
Bax bu geniş yayılmış yalnış fikir bizi – insanlığı uçuruma aparır. Belə də
düşünə bilərik: “Qoy birinci mən doğru olanı edim. Bəlkə, bu hərəkəti kimsə görər
və heç olmasa, təkrar etməyə səy göstərər”.
Yazılmamış qanunlara riayət etmək adət - ənənələrdə də özünü göstərir və
ayrı - seçkiliyə yol açır. Məsələn, cinsi ayrı – seçkiliyi buna ən böyük nümunə
çəkə bilərik.
“Qadın və kişi müəyyən
imkanların bölüşdürülməsində və hüquqda bərabərdir. Digər bütün mövzularda
qadın və kişi bərabər deyil. Qadın qadınla, kişi isə kişi ilə müqayisə
olunmalıdır. Çünki onlar nə fiziki, nə estetik, nə də cinsi olaraq bərabər
deyillər” (yazıçı, jurnalist Abdürrəhmanın müsahibəsi: https://youtu.be/j9T9Q_fZpoY ). Qadın və
kişinin bərabər hüquqlara malik olduğu qanuni təsdiqini tapdığı halda hələ ən qədim
zamanlardan başlayaraq bir çox dövlətlərdə qadınların hüquqlarının ciddi şəkildə
tapdalandığı mənbələrdə öz əksini tapmışdır. Qədim Çində yeni doğulmuş qızlara
ad verilmir, rəqəmlərlə (Ailədə neçə
uşaq varsa, o saya uyğun adlandırılırdılar) çağırılır, Hindistanda qız uşağı doğularkən cinsiyyəti bəlli
olduqdan sonra öldürülür, bizim ölkəmizdə isə ya təhsil verilmir, ya da yarıda
kəsilərək erkən ailə qurmağa sövq
edilirdi. Lakin tarixi köklərimizə nəzər
salsaq, görərik ki, qədim türklər qadınların hüquqlarını tanıyır, onlara hörmət
bəsləyirdilər. “Kitabi - Dədə Qorqud” əsərində qadınların da kişilər kimi at
minmək, ox atmaq, onlarla birlikdə döyüşə getmək imtiyazları olduğu qeyd
edilmişdir. Hətta qadınların bəziləri gələcək həyat yoldaşlarını seçmə hüququna
da sahib idilər. Güləşdə və ya döyüşdə məğlub olduqları igidlə ailə həyatı
qurardılar (Banuçiçəyi misal çəkə bilərik).
Hazırki zəmanədə isə Avropa ölkələrinin bəziləri qadına bir əşya münasibət
bəsləyir, onlara təhqir və təcavüz etməyi sosiallaşdırır. Şərq ölkələrində isə
hal – hazırda təhsil hüquq az da olsa, bərpa edilsə də, yenə də qadınlar müxtəlif
təzyiqlərə məruz qalırlar.
Qadınlar arasında belə bir sosial
eksperiment keçirilmişdir: “Bir günlük kişi olsaydınız, nə edərdiniz?” Əksəriyyətinin
bənzər səsləndirdiyi bir fikir var idi: ”Gecə gəzmək istəyirəm”. Bəli, bəzi
heyvanlar belə gecə sərbəst dolaşa bildiyi halda bunu qadınlar edə bilmir.
Çünki etdiyi təqdirdə “əxlaqsız qadın” damğasını yeyir. Məgər əxlaqlı qadın gecə
gəzintiyə çıxa, velosiped sürə, istədiyi kimi geyinə, danışa, hərəkət edə bilməzmi?
Əlbəttə ki, edə bilər, bu qanuni şəkildə qadağan edilməyib. Lakin insanlarımız
buna yalnış gözlə baxır. Məhz bu zaman şüur altımıza yerləşdirilən belə boş, mənasız
dırnaqarası dəyərlər bu arzulara mane olur. Birgə Razılaşma Konsepsiyasında da
deyildiyi kimi “Mən, Sən və O, yəni biz adətləşmiş, daşlaşmış davranış modellərimiz
üzərində düşünməli, nə üçün məhz bu cür davranmağımızı sorğulamalı və əgər bizə
zərər gətirirsə, onları kor-koranə təkrarlamaq yerinə yeniləri ilə əvəzləməyə
çalışmalıyıq”. Bəli, nəyə niyə pis gözlə
baxdığımızı, bəzi qaydaların necə var olduğunu, nə məqsədlə yarandığını bilmədiyimizi
, sadəcə “atalarımızın” belə dediyini bilirik. Bunu anlamalıyıq ki, hər zəmanənin
özünəməxsus qanunauyğunluqları vardır. Nə vaxtsa, düzgün hesab edilməyən bəzi
hadisələrə bu dövrdə tam fərqli yanaşa bilərik. Çünki zaman dəyişir və biz
yeniliklərə açıq olmalıyıq. O qədər boş şeylərə əməl edirik ki, olması lazım
olan işlər kənarda qalır. Bu fikirlərdən yola çıxaraq deyə bilərik ki, qadın
hüquqları olması gərəkdiyi kimi qorunmur, tətbiq edilmir. Sadəcə kağız üzərində
qalır.
Belə ki, yuxarıda qeyd
etdiyimiz kimi qadın və kişi hüquqi cəhətdən bərabərdir. Bu, digər sahələrdə
belə deyil. Qeyri – bərabər olan bu varlıqlar bir – birini tamamlamaq üçündürlər.
Lakin bizim mentalitet buna fərqli baxır, kişinin üstünlüyünü vurğulayır. Kişi
“ali qan” hesab edilir, onun əmrlərinə itaət etmək, ona qulluq etmək bir
borcmuş kimi kiçik yaşlardan qadınlara təlqin edilir. Ancaq N.Gəncəvi Nüşabə,
Fitnə, Şirinin; M.Füzuli Leylinin ; M.F.Axundov Pərzad, Səkinənin; C.Cabbarlı
Sevil, Dilbərin (bu siyahını istənilən qədər uzada bilərik) timsalında qadın
hüquqsuzluğunu qələmə alaraq insanların diqqətini bu mövzuya cəlb etmişlər. Beləcə
xalq bu əsərləri oxuyaraq bir nəticəyə gələ bilər. Məhz bu cür qəlibləşmiş
problemlərin həllində ziyalı təbəqənin rolu mühümdür. Konsepsiyada da qeyd
edildiyi kimi ”ziyanlı diplomlular” deyil, ziyalı insanlar cəmiyyətin
yaralarına məlhəm etməlidirlər.
Birgə Razılaşma Konsepsiyası
feminizmə də aydınlıq gətirir. Feminizm qadınların azadlıq uğrunda hərəkatının
əsasında duran cinslərin bərabərliyi nəzəriyyəsi olaraq meydana çıxmışdır.
Feminizm cərəyanı qadın hüquqlarını müdafiə etdiyi və cinsi bərabərliyi dəstəklədiyi
halda toplum içində bəzi “insancığazlar” bunu yalnış anlayır. Qadınların kişilərdən
yuxarıda durduğunu deyir və yeni bir münaqişəyə imza atır. Lakin
konsepsiyada da qeyd edildiyi kimi feminizm qadınların kişilərdən üstün
olduğunu deyil, onlarla bərabər hüquqlara malik olduğunu deyir. Çünki
konsepsiyanın müddəalarında belə yazılmışdır: “Mən (yəni fərd) ən ali varlığam. Mənim (yəni fərdin)
azadlığım ən ali dəyərdir” (1). Deməli, bütün fərdlərin azadlığını eyni cür
müdafiə edən bu konsepsiya necə ola bilər ki, cinsi ayrı – seçkilik etsin? Bütün
bunlara rəğmən belə bir sual verə bilərsiniz ki, “Bəs Birgə Razılaşma
Konsepsiyası insanlar arasında ayrı – seçkilik etmirmi?” Edir, lakin bu ayrı –
seçkilik məqsədli xarakter daşıyır. Yəni başqalarının hüquqlarını heçə sayan hər
bir fərd bu cəmiyyətdən - Birgə Razılaşma cəmiyyətində uzaqlaşdırılır, düşünməyə
sövq etdirilir.
Bir sözlə, Birgə Razılaşmanın
tələbinə görə kişiyə aid bütün hüquq və azadlıqlar qadınlara da istisnasız
olaraq şamil edilir. Birgə
Razılaşma cəmiyyətində xoşbəxt yaşamaq üçün bir – birimizin hüquqlarına hörmət
etməyimiz vacibdir. Son olaraq onu qeyd edim ki, Birgə Razılaşma
Konsepsiyasının müddəalarını qəbul etsək və yerinə yetirsək, bir zamanlar
Nizami Gəncəvinin arzuladığı, görmək istədiyi “xoşbəxtlər ölkəsində” yaşamağa
haqq qazanarıq (2).
Ədəbiyyat
siyahısı
1. Ramin
Allahverdi. Birgə Razılaşma konsepsiyası. Bakı: 2021.
2. Nizami Gəncəvi.
İskəndərnamə (İqbalnamə). Bakı: 2004.
3. Kitabi – Dədə
Qorqud. “Bayburanın oğlu Bamsı Beyrək boyu”. Bakı: 2015.
Qeyd: Müəllif Firuzə Qaloyeva bu məqaləsi ilə BİRGƏ RAZILAŞMA CƏMİYYƏTİnin “BİRGƏ RAZILAŞMA KONSEPSİYASI fərdin xoşbəxtliyini
təmin edir” adlı yazı müsabiqəsinin iştirakçısı və qaliblərindən
biridir.
Comments
Post a Comment