28. BİRGƏ RAZILAŞMA VƏ MÜLKİYYƏT TOXUNULMAZLIĞI, AZAD BAZAR
28.
BİRGƏ RAZILAŞMA VƏ MÜLKİYYƏT TOXUNULMAZLIĞI, AZAD BAZAR
Məlum olduğu kimi, BİRGƏ RAZILAŞMA KONSEPSİYASInın
2, 3 və 4-cü müddəlarında göstərilir:
1.
Mənim (hər bir insanın, fərdin) azadlığım
(müstəqilliyim) ən ali dəyərdir. Mənim azadlığım məni xoşbəxt edə biləcək
başlıca alınmaz dəyərimdir.
2. Mən (hər
bir insan, fərd) doğulduğum andan etibarən azad yaşamaq, azad olmaq, xoşbəxt
olmağa can atmaq kimi alınmaz ali haqlara malikəm. Mənim (insanın) azadlığımı
(haqlarımı) heç kəs və heç nə məhdudlaşdıra bilməz.
3. Mənim (bir
insanın, fərdin) azadlığım
yalnız və yalınız Sənin və Onun (digər insanların, fərdlərin) hüquqları, haqları başlayan yerdə
bitir (bax: https://birgeraz.blogspot.com/2020/06/birg-razilasma-mn-sn-v-o.html)
Göründüyü kimi, burada AZADLIQ
məfhumu geniş məna daşımaqla bir FƏRDə
aid edilə bilən bütün azadlıqları (söz, ifadə, yaradıclıq,
toplaşmaq, mülkiyyətə sahiblənmək və s.) özündə ehtiva edir (yeri gəlmişkən, bu
azadlıqlar barədə bu və ya digər formada əvvəlki yazılarda bəhs etmişik). FƏRDin yəni Mənim (Sən və Onun) ümdə azadlıqlarımdan
biri də sərbəst şəkildə özəl mülkiyyətə (mənə məxsus olan şeylərə) sahiblənməyimdir.
Bu o deməkdir ki, BİRGƏ RAZILAŞMA
KONSEPSİYASIna uyğun, həmçinin onun əsasında ərsəyə gələn ALİ MÜQAVİLƏ –
KONSTİTUSİYA və digər QANUNların tələblərini pozmadan əldə etdiyim, sahibləndiyim
şeylərin üzərində olan haqqım (hüquqlarım) birmənalı şəkildə tanınmalı və
qorunmalıdır.
Bu baxmdan, BİRGƏ RAZILAŞMA KONSEPSİYASIna əsaslanan
cəmiyyətdə ən vacib məsələlərdən biri də Mən, Sən və Ona məxsus olan (yəni cəmiyyət
üzvlərinə) mülkiyyətin toxunulmazlığı hər bir cəmiyyət üzvü tərəfindən qəbul
edilməli və ilk növbədə yaratdığımız DÖVLƏT tərəfindən tam şəkildə
qorunmalıdır.
Bəs MÜLKİYYƏT TOXUNULMAZLIĞI nə üçün vacibdir? Bu,
ilk növbədə ona görə vacibdir ki, FƏRDə məxsus ümdə azadlıqlardan (haqlardan)
biri olmaqla onun XOŞBƏXT yaşamasını təmin etmək iqtidarındadır. Bəzi FƏRDlər hətta
var-dövlət sahibi olmağı həyatlarının başlıca məqsədi hesab edərək, kifayət qədər
zəhmətə qatlanırlar və sərvət qazanırlar.
Özlərinin XOŞBƏXTliyini məhz belə yaşamaqda görürlər və əlbəttə ki, bu onların
azad seçimləridir.
Məhz bu cür FƏRDlər əgər BİRGƏ RAZILAŞMA KONSEPSİYASInın
əsas müddəalarına (həmiçinin, bu konsepsiya əsasında tərtib olunmuş ALİ MÜQAVİLƏ
– KONSTİTUSİYA, o cümlədən, digər qanunlara) zidd olmadan fəaliyyətini qurursa,
KONSEPSİYA onları dəstəkləyir və maksimum AZAD, ƏDALƏTLİ RƏQABƏT mühiti, bərabər
şərait (şərtlər) yaradılmasını təmin edir.
AZAD, ƏDALƏTLİ RƏQABƏT mühitində özəl mülkiyyətə
sahiblənmə FƏRDin şəxsi maraqlarına cavab verdiyinə görə, məhz həmin şəxsi
maraq naminə o, digərlərinə (başqa FƏRDlərə) xidmət göstərməyə (həm də yüksək səviyyədə)
məcbur olur. Əks təqdirdə, AZAD BAZAR onu oyundan çıxarır. Deməli, bu mənada, özəl
mülkiyyətin toxunulmazlığı AZAD BAZAR şəraitində bütövlükdə cəmiyyətin
inkişafına, rifah halının yaxşılaşmasına təkan vermiş olur.
BİRGƏ RAZILAŞMA KONSEPSİYASI onun müddəalarına zidd
fəaliyyət göstərmirsə (haqsız rəqabət və s.), cəmiyyətin demək olar ki, bütün
sahələrində AZAD BAZAR mexanizmini dəstəkləyir. Nümunə çəkməklə məsələni sadə şəkildə
izah edək. Məsələn, incəsənət və mədəniyyət sahəsində AZAD BAZAR sistemi bu sahənin
adamlarına (aktyor, şair, yazıçı və s.) imkan verir ki, istedadlıları,
bacarıqlıları qabağa çıxsın, məşhurlaşsın, varlansın və s.
Bir anlıq təsəvvür edə bilərsinizmi, ABŞ prezidenti
hansısa məşhur hollivud ulduzu olan aktyora üçotaqlı tam təmirli mənzil hədiyyə
etsin, yaxud “əməkdar incəsənət xədimi”, “xalq artisti”, “xalq yazıçısı” kimi geydirmə
titullar versin, fərdi təqaüd sədəqəsi ayırsın və ya yaxasına dəmir-dümür assın
və bütün bunları ona görə etsin ki, onu yaxşı-yaxşı mədh eləsinlər. Əlbəttə,
absurddur. ƏDALƏTLİ RƏQABƏTƏ əsaslanan AZAD BAZARın nəticəsi olaraq elə bir şərait
yaranıb ki, həmin aktyorların, yazıçıların və s. özləri yüzlərlə belə mənzillər
bağışlamaq imkanındadırlar, onların nüfuzları, şan-şöhrətləri prezidentinkindən
da qat-qat artıqdır. Ən gözəli isə budur ki, hansısa özündən müştəbeh bir
avtoritarın sədəqəsinə möhtac deyillər, onun nazı ilə oturub-durmurlar. Həmin məşhur
ulduzlar müxtəlif xeyriyyə aksiyalarında iştirak edir, belə fondlara milyonlarla
ianələr köçürürlər və s.
BİRGƏ
RAZILAŞMA KONSEPSİYASI da ƏDALƏTLİ RƏQABƏTƏ əsalanan təqribi belə bir AZAD
BAZAR mühitini nəzərdə tutur. AZAD
BAZARın fəaliyyətinin təminatçısı isə BİRGƏ RAZILAŞMA KONSEPSİYASInın müddəalarının
keşikçisi olan ƏDALƏT (MƏHKƏMƏ) HAKİMİYYƏTİdir (bax: https://birgeraz.blogspot.com/2020/06/10-birg-razilasma-v-dalt-mhkm-hakimiyyti.html)
ki, QANUNların aliliyini təmin edir və pozuntuya yol verənləri elə bir şəkildə
cəzalandırır ki, başqaları onu pozmağa cürət edə bilmirlər.
Beləliklə, FƏRDin (Mən, Sən və Onun) XOŞBƏXT
yaşamaq niyyətini təmin etməyə yönəlmiş BİRGƏ RAZILAŞMA KONSEPSİYASI onun
(bizim) həm də MÜLKİYYƏT TOXUNULMAZLIĞInın, habelə AZAD BAZAR mühitinin təşəkkül
tapması və davamlı olmasının ƏDALƏT (MƏHKƏMƏ) HAKİMİYYƏTİ vasitəsi ilə
sarsılmaz qarantıdır.
Ramin Allahverdi
Comments
Post a Comment