17. BİRGƏ RAZILAŞMA VƏ SİYASƏT
17. BİRGƏ RAZILAŞMA VƏ SİYASƏT
SİYASƏT deyəndə
cəmiyyətimizdə əksəriyyətin ağlına ilk növbədə hiylə, hiyləgərlik, aldatmaq, biclik,
fürsətdən sui-istifadə etmək və s. kimi anlamlar gəlir. Şübhəsiz ki, bir sıra digər
siyasi anlayışlar kimi SİYASƏT məfhumu da bir qisim tərəfindən qəsdən, başqa
bir qisim tərəfindən isə bilməyərəkdən bu cür təhrif olunmuş formada ictimaiyyətə
təqdim olunur. Bəs SİYASƏT nədir? Bu
suala sadə şəkildə cavab verməyə çalışaq.
SİYASƏTin ən
ümdə xüsusiyyətlərini müəyyənləşdirmiş olsaq aşağıdakıları ardıcıllıqla
sadalamalıyıq:
1. SİYASƏT – cəmiyyətdə
vacib insan davranışıdır;
2. SİYASƏT –
ictimai-sosial fəaliyyətdir;
3. SİYASƏT –
məqsədli ictimai-sosial hərəkətdir (davranış, fəaliyyətdir);
4. SİYASƏT –
yaranmış vəziyyətdə müvafiq, adekvat (doğru) qərar qəbul etmək qabiliyyətidir və
s.
Sadaladığımız
xüsusiyyətlər əsasında SİYASƏTə belə bir tərif verə bilərik: SİYASƏT – insanın
cəmiyyətdə müəyyən məqsədli ictimai-sosial davranışı olub, yaranmış vəziyyətə
uyğun adekvat (doğru) qərar qəbul etmək bacarığıdır. Yəni bir az da sadə desək,
hər hansı bir şəxsin istənilən məsələ ilə bağlı adekvat, doğru qərar vermə
qabiliyyətnə malik olmasıdır.
SİYASƏTdə iki
yanaşma müşahidə olunur:
1. Emosianal
yanaşma;
2. Rasional
yanaşma.
1. SİYASƏTdə
Emosional yanaşma zamanı adından da göründüyü kimi, insanın, qarşı tərəfin
hissləri, emosiaları hədəfə alınaraq manupulyasiya edilir. Bu yanaşmanın başlıca
mahiyyəti ondan ibarətdir ki, cəmiyyət üzvlərinin (Mən, Sən və Onun), insanların,
kütlənin hisslərini alovlandırmaqla əslində onların XÖŞBƏXT yaşamalarının təmin
olunması üçün lazım olan məsələlərdən diqqətləri yayındırılsın. Bu üsuldan
avtoritar (diktatura) idarəetmələrdə geniş istifadə olunur. SİYASƏTdə Emosional
yanaşma ilə cəmiyyətin (Mən, Sən və Onun), kütlənin ən çox aşağıdakı hissləri
manipulyasiya edilir:
a) Vətənpərvərlik
hissləri.
Məlumdur ki,
hər bir ölkədə xalqın (Mən, Sən və Onun) AZAD, firavan XOŞBƏXT yaşaması üçün
qurduğumuz DÖVLƏTin (bax: https://birgeraz.blogspot.com/2020/06/5-birg-razilasma-v-dovlt.html ) və onun idarəsini müvəqqəti olaraq, müəyyən müddətə etibar
etdiymiz HAKİMİYYƏTin (bax: https://birgeraz.blogspot.com/2020/06/6-birg-razilasma-v-hakimiyyt.html) bir sıra başlıca
öhdəlikləri var. Məhz bu öhdəlikləri DÖVLƏTin idarəsini müvəqqəti həvalə
etdiyimiz HÖKUMƏT (HAKİMİYYƏT) yerinə yetirmədikdə və ya yetirmək istəmədikdə,
yaxud bunu bacarmadıqda SİYASƏTdə emosianal yanaşmadan istifadə edərək, cəmiyyətin
(xalqın – Mən, Sən və Onun) hisslərini hədəfə almaqla öz naqis əməllərindən
diqqəti yayındırmağa çalışır. Bu tələyə isə nəinki kütlə, diplomlular da
asanlıqla düşürlər.
Tam aydın təsəvvür
yaratmaqdan ötrü belə bir suala cavab verək - DÖVLƏT və HÖKUMƏT (HAKİMİYYƏT)
xalq üçün – Mən, Sən və Onun üçün nə etməldir?
- Elə bir
mühit yaratmaldır ki, QANUNun Aliliyi təmin olunsun.
- Elə bir
mühit yaratmaldır ki, bizim hüquq və azadlıqlarımızı heç kim tapdalaya bilməsin.
- Elə bir
mühit yaratmaldır ki, Mən, Sən və O iş tapa bilək və ya iş qura bilək, normal şəkildə özümüzü və ailəmizi layiqli həyat
şərait ilə təmin edək.
- Elə bir
mühit yaratmaldır ki, yüksək səviyyədə rəqabətə davamlı təhsil ala bilək, biz,
övladlarımız, yaxınlarımız yüksək təhsil alıb daxildə və ya dünyanın istənilən
yerində öz xoşbəxtiyini təmin etmək qabiliyyətinə yiyələnmiş olsun.
- Elə bir
mühit yaratmaldır ki, biz və əzizlərimizin sağlamlığı üçün hər bir şərait təmin
olunsun, yüksək səhiyyə xidmətimiz olsun (başqa ölkələrə müalicə üçün getməyək).
- Bir sözlə, elə
bir mühit yaratmaldır ki, AZAD və ƏDALƏTLİ cəmiyyətdə XOŞBƏXT ola bilək və s.
Lakin bütün
bu öhdəliklər DÖVLƏT (HÖKUMƏT, HAKİMİYYƏT) tərəfindən yerinə yetirilməsi əvəzinə,
əgər 5000 metr uzunluğunda bayraq düzəldilib cəmiyyətin (Mən, Sən və Onun) vətənpərvərlik
hissləri manipulyasiya edilərək diqqət yuxarıda göstərdiyim məsələlərdən
yayındırılmağa çalışılırsa, buna SİYASƏTdə Emosional yanaşma deyirlər. 5000
yox, hətta 100000 metr uzunluğunda bayrağın hazırlanması da bizi XOŞBƏXT edə
bilməz. Biz yalnız və yalnız yuxarda sadaladıqlarım o kimi öhdəliklər yerinə
yetirilərsə, XOŞBƏXT ola bilərik.
b) Ən çox manipulyasiya olunan məsələlərdən
biri də cəmiyyətin (Mən, Sən və Onun) DİNİ inanclarıdır. Bu zaman müxtəlif dini
söhbətlərlə, hərəkətlərlə və s. kütlənin,
xalqın diqqəti problemlərdən, yuxarıda sadaladığım məsələlərdən yayındırılır.
Turgay
Yıldızın sarkazmlı iki dəqiqəlik bir videosu praktiki olaraq dini inanc hisslərinin
necə manipulyasiya edildiyini əyani şəkildə izhar edir (bax: https://www.youtube.com/watch?v=wSsfbC38gog ).
c) Xarici
düşmən obrazı yaratmaqla nifrət hisslərini alovlandırmaq da SİYASƏTdə emosional
yanaşmanın geniş yayılmış variyasiyalarındandır. Bu yaxınlarda Ermənistan
silahlı qüvvələri tərəfindən Tovuz istiqamətində bir təxribat oldu. Bu hadisəyə
analitik-təhlili nəzər salmaqla SİYASƏTdə
Emosional yanaşmanın əyani formada necə üzə çıxdığını görə bilərik. Məsələn, baş
vermiş hadisə ilə əlaqədar olaraq bizim diplomlular (ZİYALI sözünü onlara aid
etmək olmur deyə diplomlular deyirəm – fərqi
yoxdur, bakalavr, magistr, fəlsəfə doktoru, yaxud elmlər doktoru diplomları var
– hamsı diplomludur) o saat hay-küy salaraq
müharibə çağırışı etdilər, bəziləri hərbi səfərbərlik üzrə könüllü qeydiyyata
düşüb qeydiyyat fotosunu sosial şəbəkələrdə paylaşdı, şüvənlik etdilər ki, “hamı
orduya getməlidir” və s.
Bütünlükdə
proseslərə emosional yanaşan bu diplomluların, görəsən, ağıllarına azacıq da
olsa gəldimi ki, ordunun peşəkar kadr generalının hərəkət trayektoriyası çətinlik
çəkilmədən müəyyən edilib vurulursa, hərbi bilgi baxımdan küt olan həmin
diplomlular orduya gedib neyləyəcəklər. Yeri
gəlmişkən, bir çoxları (şəxsən tanıdıqlarım da var, bəzilərinin səmimiyyətinə də
şübhəm yoxdur) ölü bir təşkilat olan AMEA-ya həftənin 3 günü (tək günləri) güclə
gəlib-gedirlər.
Görəsən, bu diplomlular çətinlik çəkilmədən hərəkət trayektoriyası müəyyən
edilib vurulan ləyaqətli peşəkar kadr generaldan (yaxud da digər peşəkar kadr
zabitlərdən) hərbi strategiya və taktikaları artıqmı bilirlər?! Onlar bir
ordunun peşəkar kadr generalının hərəkət trayektoriyasının müəyyən edilib bir
atışla vurulmasının nə demək olduğunu dərk edə bilirlərmi?! Rasionallıqdan uzaq
düşən bu diplomlular anlamırlar ki, hərbiyə, orduya bu mənada yararsızdırlar.
Onların əlindən gələn iş o idi ki, sözün əsl mənasında ZİYALI olsunlar, cəmiyyətə
çıxış yolu göstərsinlər, amma onu da bacarmırlar (bax: https://birgeraz.blogspot.com/2020/06/11-birg-razilasma-v-ziyali-institutu.html). Çünki aldıqları zay təhsil
buna imkan vermir, nə də bu diplomlular öz üzərlərində çalışıb qabaqcıl, beynəlxalq
səviyyəli təhsil sitemi, elmi araşdırmalarla tanış olub siyasi şüurlarının
inkişafı ilə əlaqədar lazımi ədəbiyyatı (əkəsəriyyəti ingilis dilindədir)
oxuyub öz bilgilərini təkmilləşdirib dünya ilə ayaqlaşa bilmirlər. Bəziləri Şah
İsmayıl Xətaidən dən vur-vura elə bilir ki, düşməni qılınc-qalxanla gedib məğlub
edəcəklər. Daha başa düşmürlər ki, gedib ancaq əl-ayağa dolaşacaqlar. Adamlar hələ
də dərk etmirlər ki, müasir dövrün hərbisində makismum cansız siahlı qüvələrdən
istifadə hal-hazırda ön plandadır və s.
Bəs SİYASƏTdə
Rasional yanaşma nə deməkdir?
SİYASƏTdə Rasional
yanaşma faktlara, onun fundamental elmi təhlilinə, dərin və əhatəli bilgilər,
ciddi hesablamalara və s. əsaslanan QƏRAR qəbul etmə mexanizmidir.
Rasional
yanaşma bütün parametrləri ilə emosionallığı rədd edir və onun tamamilə əksidir.
DÖVLƏT idarəetməsində, cəmiyyətin, Mən, Sən və Onun həyatı, yaşamı ilə bağlı
SİYASİ QƏRARların çıxarılması isə ilk növbədə tək bir nəfər tərəfindən verilə
bilməz, burada bütün SİYASİ QƏRARlar institutsional səviyyədə qəbul edilməlidir.
Bu isə kollektiv peşəkar (təşkilati) müstəvidə SİYASİ QƏRARların çıxarılmasını
nəzərdə tutan və siyasi ədəbiyyatda geniş istifadə olunan “Bounded Rationality”
- “Məhdudiyyətli Rasionallıq”dan irəli gəlir. Məhdudiyyətli Rasionallıq nəzəriyyəsinə
görə (müəllifi Herbert A. Simondur), birincisi,
istənilən tək bir şəxsin zehni və fiziki göstəriciləri imkan vermir ki, hər bir
məsləni lazımi səviyyədə, bütün parametrləri ilə tam şəkildə nəzərə alıb
hesablaya bilsin. İkincisi də bir şəxsin (fərdin) bütün lazımi məlumatlarla
tanış olub hesablamalar aparması üçün kifayət
qədər uzun bir müddət tələb olunur (yəni zaman yerində dayanıb həmin şəxsi gözləmir)
və məlumatlar daima təzələndiyindən onunla ayaqlaşmaq bəlli zaman çərçivəsində
sadəcə qeyr-mümkündür (bax: Herbert A.
Simon. "Theories of Bounded Rationality", 1972, in Radner and Radner,
editors, Decision and Organisation).
Məhz buna görə,
Məhdudiyyətli Rasionallıq prinsipinin də
tələb etdiyi kimi, elə bir mexanizmlər, institutlar qurulmalıdır ki, həmin təşkilati institutlar cəmiyyətin
(Mən, Sən və Onun) taleyi ilə bağlı adekvat, doğru SİYASİ QƏRARlar vermək
iqtidarında olsun. Yəni məsələyə institutsional (təşkilati) səviyyədə
yanaşılmalıdır ki, sadə dillə desək, bir baş yox, min peşəkar mütəxəssisin başı
bu tale yüklü qərarların istehsalında iştirak edə bilsin. Bizim atalar sözündə
deyildiyi kimi, “bir baş ağıllıdır, iki (çox) baş ondan daha ağıllıdır”.
BİRGƏ
RAZILAŞMA KONSEPSİYASIna görə, Mən, Sən və Onun, yəni cəmiyyət üzvlərinin
taleyi ilə bağlı bütün məsələlər üzrə SİYASİ QƏRARların verilməsi rasional şəkildə
həyata keçirilməli nəzəri və praktik cəhətdən özünü doğrultmuş Məhdudiyyətli
Rasionallıq tezisləri nəzərə alınaraq, maksimum institutusional (təşkilati,
kollektiv) formada, təbii ki, RAZILAŞMAnın müddəalarına uyğun biçimdə həyata
keçirilməlidir.
Yəni Mən, Sən
və Onun - cəmiyyətin taleyi, müqqəddəratı ilə əlaqəli SİYASİ qərarları Mən, Sən, yaxud O (hansısa şəxs), təkbaşına
verə bilməz və verməməlidir. SİYASİ QƏRAR vermə mexanizmi elə qurulmaldır ki,
mütəxəssis qrupların geniş, əhatəli hesablamaları, BİRGƏ RAZILAŞMAnın əsas müddəalarına
uyğun olaraq, Mən, Sən və Onun (cəmiyyətin) mənafeyi əsas götürülərək qəbul
edilsin. Məhz buna görə də çağdaş DÖVLƏT idarəçiliyində İKİPALATALI PARLAMENTLİ
RESPUBLİKA modeli məqbul sayıla bilir.
Ramin
Allahverdi
Comments
Post a Comment